భార్యపై విమర్శలు ఎక్కుపెట్టిన షమీ

భారత ఫాస్ట్ బౌలర్ మహ్మద్ షమీ తనపై వస్తున్న ఆరోపణలకి ఘాటుగా స్పందించాడు. తన భార్య హసీన్ జహాన్ చేసిన ఆరోపణల్లో వాస్తవాలు లేవని.. ఆమె ఒట్టి అబద్దాలకోరని విమర్శించాడు. ఆమె ఆరోపించినట్లుగా తాను ఫిక్సింగ్‌కి పాల్పడలేదని.. ఒకవేళ నేరానికి పాల్పడినట్లు తేలితే ఉరిశిక్షకైనా తాను సిద్ధమని ప్రకటించాడు. తనతో పెళ్లికి ముందే హసీన్‌కి వివాహమైన విషయం చెప్పలేదని.. పిల్లల్ని తన సోదరి పిల్లలుగా పరిచయం చేసినట్లు షమీ వెల్లడించాడు.

‘హసీన్‌కి గతంలో వివాహమైన విషయం పెళ్లికి ముందు నాకు తెలియదు. ఇద్దరు కూతుళ్లని తన అక్క పిల్లలుగా నాకు పరిచయం చేసింది. ఆ తర్వాత హసీన్ మొదటి వివాహం గురించి నాకు తెలిసింది. అయినప్పటికీ తనని నేను చాలా బాగా చూసుకున్నా. కానీ.. తనెప్పుడూ అభద్రతాభావంలోనే ఉండేది. ఆమె నాపై చేసిన ఫిక్సింగ్ ఆరోపణల్లో వాస్తవాలు లేవు. ఇంత గొడవ జరిగినా.. ఇప్పటికీ ఆమెతో నేను రాజీపడేందుకు సిద్ధంగానే ఉన్నా. ఇందులో భాగంగానే ఆమెకి ఫోన్ చేస్తుంటే.. వేధిస్తున్నాడంటూ మీడియాతో చెప్తోంది. ఇప్పుడు నా కూతురి భవిష్యత్ నాకు ముఖ్యం’ అని మహ్మద్ షమీ ఉద్వేగంగా వెల్లడించాడు.