షమీ ఫోన్ నా దగ్గర లేకపోయుంటే..?

టీమిండియా క్రికెటర్ మహ్మద్ షమీపై అతడి భార్య ఫిర్యాదు చేయడంతో కోల్‌కతా పోలీసులు పలు సెక్షన్ల కింద కేసు నమోదు చేశారు. తన భర్తకు చాలా మంది అమ్మాయిలతో సంబంధాలు ఉన్నాయని ఆరోపించిన హసీన్ జహాన్.. అతడు పాకిస్థాన్‌కు చెందిన అమ్మాయిని పెళ్లాడాడని, ఫిక్సింగ్‌కు పాల్పడ్డాడని సంచలన కామెంట్లు చేసింది. వేరే అమ్మాయిలతో షమీ చాటింగ్ చేసిన వివరాలను ఆమె ఫేస్‌బుక్‌లో పోస్టు చేసింది. ఆదివారం మీడియా ముందుకు వచ్చిన హసీన్ మరోసారి షమీపై విమర్శలు గుప్పించింది.

షమీ మొబైల్ ఫోన్ దొరక్కపోతే అతడు నాకు ఇప్పటికే విడాకులు ఇచ్చేవాడని హసీన్ చెప్పింది. తప్పును ఒప్పుకోమని కోరాను. చాలా కాలంగా అతణ్ని బతిమాలాను. నా దగ్గర అతడి ఛాటింగ్ వివరాలున్న ఫోన్ లేకపోతే షమీ ఉత్తరప్రదేశ్ పారిపోయి ఉండేవాడని జహాన్ తెలిపింది.

మీడియా కూడా షమీకే మద్దతు పలుకుతోందని జహాన్ ఆవేదన వ్యక్తం చేసింది. తన లాయర్లు బీసీసీఐతో మాట్లాడతారని చెప్పిన ఆమె.. ఇప్పటికే షమీ తన తప్పును ఒప్పుకుంటే.. కలిసి ఉంటానని చెప్పింది.