ధోనీ తప్పిదం.. రెండు క్యాచ్‌లు మిస్

భారత వికెట్ కీపర్ మహేంద్రసింగ్ ధోనీ.. నాగ్‌పూర్ వేదికగా ఆస్ట్రేలియాతో ఆదివారం జరుగుతున్న ఐదో వన్డేలో వరుసగా రెండు తప్పిదాలు చేశాడు. ఎడమచేతి వాటం స్పిన్నర్ అక్షర్ పటేల్ బౌలింగ్‌లో.. రెండు సార్లు ఆసీస్ మిడిలార్డర్ బ్యాట్స్‌మెన్ స్టాయినిస్‌ ఇచ్చిన సులవైన క్యాచ్‌ల్ని వదిలేశాడు. గత గురువారం బెంగళూరులో జరిగిన నాలుగో వన్డేలో కూడా ఓపెనర్ అరోన్ ఫించ్ స్టంపింగ్‌ని ధోనీ వదిలేసిన విషయం తెలిసిందే.

ఈ మ్యాచ్‌లో ఇన్నింగ్స్ 27వ ఓవర్‌ వేసిన అక్షర్ పటేల్.. ఆఫ్ స్టంప్‌ని లక్ష్యంగా చేసుకుని బంతిని విసిరాడు. అయితే.. మిడిల్‌ వికెట్‌‌పై ఉండి బంతిని డిఫెన్స్ చేసేందుకు స్టాయినిస్ ( అప్పటికి స్కోరు 6 బంతుల్లో 5 పరుగులు) ప్రయత్నించాడు. కానీ.. టర్న్ తీసుకున్న బంతి అతని బ్యాట్‌ అంచును తాకుతూ వెనక్కి వెళ్లింది. ఈ క్యాచ్‌ని అందుకోవడంలో ధోనీ, స్లిప్‌లో ఫీల్డింగ్ చేస్తున్న రహానె సంయుక్తంగా విఫలమయ్యారు. దీంతో బంతి బౌండరీని తాకడంతో ఆశ్చర్యపోవడం అక్షర్ వంతైంది. అనంతరం 31వ ఓవర్‌లో కూడా ఇదే తరహాలో క్యాచ్‌గా వచ్చిన బంతిని అందుకోవడంలో ధోనీ మరోసారి విఫలయ్యాడు. ఇది కూడా కీపర్ వెనకవైపు బౌండరీ లైన్‌ని తాకింది. ఆ సమయంలో బౌలర్ అక్షర్ పటేల్ కీపర్ ధోనీ తీరుపై తీవ్ర అసహనం వ్యక్తం చేశాడు. అప్పటికి స్టాయినిస్ స్కోరు 18 బంతుల్లో 14 పరుగులు.