ధోనీ రీఎంట్రీపై వైస్ కెప్టెన్ రోహిత్ శర్మ క్లారిటీ

భారత మాజీ కెప్టెన్ మహేంద్రసింగ్ ధోనీ మళ్లీ టీమిండియా తరఫున మ్యాచ్‌లు ఆడతాడని వైస్ కెప్టెన్/ఓపెనర్ జోస్యం చెప్పాడు. 2019 వన్డే ప్రపంచకప్ తర్వాత భారత్ జట్టుకి దూరమైన ధోనీ.. దాదాపు 10 నెలల నుంచి ఎలాంటి మ్యాచ్‌లు ఆడటం లేదు. దీంతో.. అతని కెరీర్ ఇక ముగిసిపోయిందనే అభిప్రాయాలు వినిపిస్తున్నాయి. అయితే.. ఐపీఎల్ 2020 సీజన్‌లో ఫామ్ అందుకోవడం ద్వారా మళ్లీ టీమిండియాలోకి రీఎంట్రీ ఇవ్వాలని ధోనీ ఆశించాడు. కానీ.. కరోనా వైరస్ కారణంగా ఐపీఎల్‌ని బీసీసీఐ నిరవధికంగా వాయిదావేయడంతో ధోనీ కెరీర్ ప్రశ్నార్థకంలో పడిపోయింది.

Read More: ధోనీ తెల్ల గడ్డంపై జోకులు.. నా బిడ్డకి వయసైపోలేదు: ధోనీ తల్లి

సురేశ్ రైనాతో ఇన్‌స్టాగ్రామ్ లైవ్ సెషన్‌లో రోహిత్ శర్మ మాట్లాడుతుండగా.. ధోనీ భవితవ్యం గురించి చర్చ వచ్చింది. ఈ సందర్భంగా రైనా మాట్లాడుతూ ‘‘ధోనీతో ఇటీవల చెన్నై సూపర్ కింగ్స్ టీమ్ ట్రైనింగ్ సెషన్స్‌‌లో కలిసి బ్యాటింగ్ చేశాను. చాలా చక్కగా బంతిని అతను హిట్ చేశాడు. కానీ.. అతని మనసులో ఏముందో..? కేవలం అతనికి మాత్రమే తెలుసు. అతని వ్యూచర్ ప్లాన్ ఏంటో చెప్తే అప్పుడు మనకీ ఓ క్లారిటీ వస్తుంది’’ అని వెల్లడించాడు.

Read More:రోహిత్ శర్మకి రైనా ఫిర్యాదు.. నా చేతుల్లో ఏమీ లేదన్న హిట్‌మ్యాన్

ధోనీ గురించి సురేశ్ రైనా చెప్పిన విషయాల్ని సాంతం విన్న రోహిత్ శర్మ.. తన అభిప్రాయాన్ని కూడా చెప్పాడు. ‘‘ధోనీ మెరుగ్గా బ్యాటింగ్ చేయగలిగితే.. అతను తప్పకుండా టీమిండియాకి ఆడి తీరాలి. అతను ఆడగలడని నాకు తెలుసు’’ అని ధీమా వ్యక్తం చేశాడు. ఆస్ట్రేలియా వేదికగా ఈ ఏడాది అక్టోబరులో టీ20 వరల్డ్‌కప్ జరగనుండగా.. అప్పటిలోపు టీమ్‌లోకి రీఎంట్రీ ఇవ్వాలని ధోనీ, రైనా ఆశిస్తున్న విషయం తెలిసిందే.