ధోనీ, యువీలు మళ్లీ దొరకలేదు: ఎమ్మెస్కే

భారత మాజీ కెప్టెన్ మహేంద్రసింగ్ ధోని, మాజీ ఆల్‌రౌండర్ యువరాజ్ సింగ్‌ స్థానాల్ని టీమిండియాలో తాము భర్తీ చేయలేకపోయామని మాజీ చీఫ్ సెలక్టర్ ఎమ్మెస్కే ప్రసాద్ అభిప్రాయపడ్డాడు. ఇటీవల పదవీకాలం ముగియడంతో చీఫ్ సెలక్టర్ బాధ్యతల నుంచి ఎమ్మెస్కే ప్రసాద్ తప్పుకోగా.. అతని స్థానంలో కర్ణాటకకి చెందిన సునీల్ జోషి ఎంపికైన విషయం తెలిసిందే. సెలక్టర్, చీఫ్ సెలక్టర్‌గా సుదీర్ఘకాలం ఉన్నప్పటికీ.. ధోనీ, యువీ స్థానాల్ని భర్తీ చేయలేకపోయామనే లోటు ఉండిపోయిందని ఎమ్మెస్కే చెప్పుకొచ్చాడు.

‘భారత క్రికెట్‌లో మహేంద్రసింగ్ ధోని, యువరాజ్ సింగ్‌ దిగ్గజ స్థాయి ఆటగాళ్లు. వారి స్థానాల్ని టీమ్‌లో భర్తీ చేసే ఆటగాళ్లు అంత సులువుగా దొరుకుతారని నేను అనుకోవడం లేదు. ఒక చీఫ్ సెలక్టర్‌గా నా ప్రాథమిక బాధ్యత టాలెంట్ ఉన్న ఆటగాళ్లని గుర్తించడం.. వారికి తగిన అవకాశాల్ని ఇస్తూ ప్రోత్సహించడం. అదే నేను నిర్వర్తించాను’ అని ఎమ్మెస్కే ప్రసాద్ వెల్లడించాడు.

2019 వన్డే ప్రపంచకప్‌కి భారత్ జట్టు ఎంపిక సమయంలో అంబటి రాయుడ్ని పక్కన పెట్టడంపై అప్పట్లో ఎమ్మెస్కే ప్రసాద్‌పై పెద్ద ఎత్తున విమర్శలు వచ్చాయి. ఆ తర్వాత నెం.4 ఆటగాడ్ని గుర్తించడంలోనూ భారత సెలక్టర్లు విఫలమయ్యారని గణాంకాలు చెప్తున్నాయి. అయితే.. ధోనీ నుంచి కెప్టెన్సీ బాధ్యతల్ని సజావుగా కోహ్లీకి అప్పగించడంలో ఎమ్మెస్కే చతురతకి అప్పట్లో ప్రశంసలు దక్కాయి.