కుర్రాడి దెబ్బకి టీ20 రికార్డులన్నీ బ్రేక్

సెలక్టర్లు తనని విస్మరించారనే కోపంతో ఊగిపోయిన 19 ఏళ్ల కుర్రాడు టీ20‌ ఫార్మాట్‌లోని రికార్డులన్నీ బద్ధలు కొట్టేశాడు. కేవలం 67 బంతుల్లోనే ఏకంగా 200 పరుగులు చేసి ఔరా అనిపించాడు. తొలి బంతి నుంచీ విధ్వంసకంగా సాగిన అతని ఇన్నింగ్స్‌లో 21 ఫోర్లు, 15 సిక్సర్లు ఉండటం విశేషం. ముంబయి జూనియర్ జట్టు సెలక్టర్లు ఇటీవల అండర్-19 కోసం జట్టును ఎంపిక చేసే సమయంలో రుద్ర దండేను పక్కన పెట్టారు. దీంతో ఒకింత అసహనంతో ఉన్న దండే తాజాగా ముంబయి యూనివర్సిటీ కాలేజీలకు నిర్వహించిన టీ20 టోర్నమెంట్‌లో ఏకంగా డబుల్ సెంచరీ బాదేసి సెలక్టర్లకి గట్టి సమాధానమిచ్చాడు.

టోర్నమెంట్‌లో భాగంగా దండే ప్రాతినిధ్యం వహిస్తున్న రిజ్వీ కాలేజీకి, దాల్మియా కళాశాలకు మధ్య మ్యాచ్ జరిగింది. ఇందులో దండే దూకుడుతో తొలుత బ్యాటింగ్ చేసిన రిజ్వీ 20 ఓవర్లలో రెండు వికెట్ల నష్టానికి 322 పరుగుల భారీ స్కోరు చేసింది. ప్రతి బంతినీ బౌండరీకి తరలించాలనే కసితో దండే హిట్టింగ్ చేయడంతో బౌలర్లు హడలెత్తిపోయారు. ఈ క్రమంలోనే కేవలం 39 బంతుల్లో శతకాన్ని పూర్తిచేసుకున్న ఈ యువ హిట్టర్ అనంతరం మరింత రెచ్చిపోయాడు. దాల్మియా కెప్టెన్ వరుసగా బౌలర్లను మారుస్తూ దండేని నియంత్రించేందుకు ప్రయత్నించినా ఫలితం లేకపోయింది. శతకం వూపులోనే వరుస సిక్సర్లు బాదేసిన ఈ కుర్రాడు మరో 28 బంతుల్లోనే 100 పరుగులు చేసి అజేయ డబుల్ సెంచరీ రికార్డు నెలకొల్పాడు. ఇప్పటి వరకు టీ20ల్లో అత్యధిక స్కోరు వెస్టిండీస్ హిట్టర్ క్రిస్‌గేల్ పేరిట ఉంది. అతను 66 బంతుల్లో 175 పరుగులు చేశాడు. తాజాగా దండే దూకుడుతో ఆ రికార్డు తుడిచిపెట్టుకుపోయింది. ఈ హిట్టర్ ధాటికి మానసికంగా ఢీలాపడిన దాల్మియా జట్టు ఛేదనలో 10.2 ఓవర్లలో 75 పరుగులకే ఆలౌటైంది. దీంతో రిజ్వీ జట్టు 247 పరుగుల భారీ స్కోరు తేడాతో ఘన విజయాన్ని అందుకుంది.