ఒక్క సిక్సర్ తేడాతో అరుదైన రికార్డ్ మిస్సయ్యాడు

సొంత గడ్డ మీద బంగ్లాదేశ్‌పై న్యూజిలాండ్ బ్యాట్స్‌మెన్ చెలరేగారు. బంగ్లాతో జరిగిన చివరి టీ20లో కివీస్ ప్లేయర్ కోరె అండర్సన్ 41 బంతుల్లోనే 94 పరుగులు చేసి నాటౌట్‌గా నిలిచాడు. దీంతో ఆతిథ్య జట్టు నిర్ణీత 20 ఓవర్లలో 194 పరుగులు చేసింది. బదులుగా బంగ్లా జట్టు ఆరు వికెట్లు కోల్పోయి 167 రన్స్ మాత్రమే చేసింది. దీంతో 27 పరుగుల తేడాతో కివీస్ విజయం సాధించింది. ఇప్పటికే రెండు టీ20 మ్యాచ్‌లు నెగ్గిన కివీస్ 3-0 తేడాతో టీ20 సిరీస్‌ను కైవసం చేసుకుంది.

ఐదోస్థానంలో బ్యాటింగ్‌కు దిగిన అండర్సన్ బంగ్లా బౌలర్లపై చెలరేగాడు. కెప్టెన్ విలియమ్సన్‌తో కలిసి నాలుగో వికెట్‌కు 124 పరుగుల రికార్డు భాగస్వామ్యాన్ని నెలకొల్పాడు. 41 బంతుల్లోనే 96 రన్స్ చేసి టీ20ల్లో ఫాస్టెస్ట్ సెంచరీ దిశగా సాగాడు. 16 ఓవర్లు ముగిసే సరికి అండర్సన్ 41 పరుగులు మాత్రమే చేశాడు. చివరి ఓవర్లో గేరు మార్చినప్పటికీ శతకానికి కొద్ది దూరంలో నిలిచిపోయాడు. చివరి ఓవర్లో రెండు సిక్సర్లు సహా 15 రన్స్ చేసిన అండర్సన్ 6 పరుగుల తేడాతో అరుదైన రికార్డు మిస్సయ్యాడు. ఆఖరి ఓవర్లో కొంచెం ప్రణాళిక బద్ధంగా వ్యవహరించి ఉంటే సౌతాఫ్రికా ప్లేయర్ రిచర్డ్స్ లెవీ 45 బంతుల్లో సాధించిన వేగవంతమైన టీ20 సెంచరీ రికార్డును అండర్సన్ బద్దలు కొట్టేవాడే. పది సిక్సర్లు బాదిన అండర్సన్ మరో సిక్సర్ కొట్టి ఉంటే.. ఫాస్టెస్ట్ సెంచరీ అతడి ఖాతాలో చేరేది.

భారీ లక్ష్యంతో బరిలోకి దిగిన బంగ్లాదేశ్‌కు ఓపెనర్లు తమీమ్ ఇక్బాల్, సౌమ్య సర్కారు మంచి ఆరంభాన్ని ఇచ్చారు. ఐదు ఓవర్లలో వీరిద్దరూ కలిసి 44 పరుగులు రాబట్టారు. ఈ దశలో 24 రన్స్ వద్ద తమీమ్ అవుటయ్యాడు. అయినా బంగ్లా బాగానే ఆడింది. 10 ఓవర్లలో ఆట్టు రెండు వికెట్లు కోల్పోయి 89 రన్స్ చేసింది. 14 ఓవర్లలో 120 పరుగులు చేసి విజయం దిశగా సాగింది. కానీ ఈ దశలో స్పిన్నర్ ఇష్ సోధీ అద్భుతంగా వేయడంతో మ్యాచ్ కివీస్‌వైపు మొగ్గింది. కొద్దిలో సెంచరీని కోల్పోయినప్పటికీ.. కివీస్ విజయంలో కీలకపాత్ర పోషించిన అండర్సన్‌కే ప్లేయర్ ఆఫ్ ది మ్యాచ్ దక్కింది.