​ పది వికెట్లు ఇచ్చారు.. ఒక్క వికెట్ తీయలేదు

భారత్, ఆస్ట్రేలియా మధ్య జరుగుతున్న బెంగళూరు టెస్టులో తొలి రోజు ఆట ముగిసింది. భారీ అంచనాల మధ్య టాస్ గెలిచి బ్యాటింగ్ ఎంచుకున్న భారత్ జట్టు.. ఆసీస్ స్పిన్నర్ లియాన్ (8/50) ధాటికి తొలి ఇన్నింగ్స్‌లో 189 పరుగులకే కుప్పకూలిపోయింది. అనంతరం బ్యాటింగ్ ప్రారంభించిన ఆస్ట్రేలియా 16 ఓవర్ల పాటు బ్యాటింగ్ చేసి వికెట్ నష్టపోకుండా 40 పరుగులతో నిలిచింది. ఓపెనర్లు డేవిడ్ వార్నర్ (23), రేన్‌షా (15) భారత్ బౌలర్లను సమర్థంగా ఎదుర్కొని 98 బంతుల్లో 40 పరుగుల అజేయ భాగస్వామ్యంతో నిలిచారు. డేవిడ్ వార్నర్ ఇచ్చిన క్యాచ్‌ను గల్లీ ప్రాంతంలో రహానె నేలపాలు చేయడంతో కనీసం ఒక వికెట్ తీయాలనుకున్న భారత్ ఆశ నెరవేరలేదు. ఆస్ట్రేలియా ఇంకా 149 పరుగులు తొలి ఇన్నింగ్స్‌లో వెనకబడి ఉంది.

ఈ టెస్టులో భారత్ విజయం సాధించాలంటే ఆస్ట్రేలియాను ఆదివారం భారీ స్కోరు చేయకుండా కట్టడి చేయాలి. పుణె టెస్టులో అద్భుత ఫామ్‌తో ఆకట్టుకున్న స్టీవ్ ‌స్మిత్, రేన్‌షాలరను తొందరగా పెవిలియన్‌కు పంపడమే కాకుండా.. తొలి సెషన్‌లోనే వార్నర్‌ని ఔట్ చేయగలగితే భారత్‌కి అవకాశాలు మెరుగవతాయి. ఐపీఎల్ మ్యాచ్‌ల కారణంగా బెంగళూరు పిచ్‌పై వార్నర్‌కి మంచి అవగాహనం ఉంది. అతను కుదురుకుంటే భారత్ బౌలర్లకు కష్టాలు తప్పకపోవచ్చు.