శివాలెత్తిన శిఖర్.. లంక టార్గెట్ 175

ముక్కోణపు టీ20 సిరీస్ ఆరంభ మ్యాచ్‌లోనే భారత ఓపెనర్ శిఖర్ ధావన్ శివాలెత్తిపోయాడు. కొలంబో వేదికగా ఆతిథ్య శ్రీలంకతో మంగళవారం జరుగుతున్న మ్యాచ్‌లో శిఖర్ ధావన్ (90: 49 బంతుల్లో 6x4, 6x6) ఆకాశమే హద్దుగా చెలరేగడంతో తొలుత బ్యాటింగ్ చేసిన భారత్ జట్టు నిర్ణీత 20 ఓవర్లలో 5 వికెట్ల నష్టానికి 174 పరుగులు చేసింది. ధావన్‌తో పాటు మనీశ్ పాండే (37: 35 బంతుల్లో 3x4, 1x6), రిషబ్ పంత్ (23: 23 బంతుల్లో 1x4, 1x6) కీలక ఇన్నింగ్స్ ఆడారు. శ్రీలంక బౌలర్లలో చమీర రెండు, నువాన్ ప్రదీప్, జీవన మెండిస్, గుణతిలక తలో వికెట్ పడగొట్టారు.

టాస్ గెలిచిన శ్రీలంక కెప్టెన్ దినేశ్ చండిమాల్.. భారత్‌ని బ్యాటింగ్‌కు ఆహ్వానించాడు. ఓపెనర్, తాత్కాలిక కెప్టెన్ రోహిత్ శర్మ తొలి ఓవర్‌లోనే డకౌటై నిరాశపరచగా.. అనంతరం వచ్చిన సురేశ్ రైనా (1) ఫుల్‌టాస్ బంతిని అంచనా వేయలేక పేలవ రీతిలో బౌల్డయ్యాడు. దీంతో.. భారత్ జట్టు రెండు ఓవర్లు ముగిసే సమయానికి 9/2తో ఆత్మరక్షణలో పడింది. ఈ దశలో జట్టు స్కోరు బోర్డు బాధ్యతలు తీసుకున్న శిఖర్ ధావన్ వరుస బౌండరీలతో శ్రీలంక బౌలర్లపై ఎదురుదాడికి దిగాడు. షార్ట్ పిచ్ బంతుల్ని సైతం లెక్కచేయకుండా.. కళ్లు చెదిరే రీతిలో స్టాండ్స్‌లోకి సిక్సర్లుగా తరలించేశాడు. ఈ క్రమంలోనే అర్ధ శతకం పూర్తి చేసుకున్న ధావన్.. మూడో వికెట్‌కి మనీశ్ పాండేతో కలిసి 95 పరుగుల భాగస్వామ్యం నెలకొల్పడంతో భారత్ జట్టు కోలుకుంది.

శతకం దిశగా వేగంగా దుసుకెళ్తున్న శిఖర్ ధావన్.. జట్టు స్కోరు 153 వద్ద గుణతిలక బౌలింగ్‌లో భారీ షాట్ ఆడబోయి బౌండరీ లైన్‌కి సమీపంలో తిసార పెరీరా చేతికి చిక్కాడు. భారీ అంచనాల మధ్య తుది జట్టులోకి వచ్చిన రిషబ్ పంత్ తొలుత క్రీజులో తడబడినా.. చివర్లో పుంజుకున్నాడు. దినేశ్ కార్తీక్ (13 నాటౌట్: 6 బంతుల్లో 2x4) కూడా చివరి ఓవర్‌లో బ్యాట్ ఝళిపించడంతో భారత్ మెరుగైన స్కోరు చేయగలిగింది.