కోహ్లీ.. రిటైర్మెంట్‌పై తొందరేలా..?: కోచ్

భారత కెప్టెన్ విరాట్ కోహ్లి మరో ఐదారేళ్లలో రిటైర్మెంట్ ప్రకటించబోతున్నట్లు వస్తున్న వార్తలపై అతని చిన్ననాటి కోచ్ రాజ్‌కుమార్ శర్మ స్పందించాడు. వెస్టిండీస్‌తో ఇటీవల గౌహతి వేదికగా ముగిసిన తొలి వన్డే మ్యాచ్‌లో భారత్ జట్టు ఘన విజయం సాధించిన తర్వాత.. విరాట్ కోహ్లి మాట్లాడుతూ ‘క్రికెట్‌ని ఎంజాయ్ చేయడానికి నా కెరీర్‌లో కొన్ని సంవత్సరాలే మిగిలి ఉన్నాయి. దేశం తరఫున ఆడటం గొప్పగా, గర్వంగానూ ఉంటుంది. అందుకే.. ఏ మ్యాచ్‌ని తేలిగ్గా తీసుకోను’ అని భావోద్వేగానికి లోనయ్యాడు. ఈ నేపథ్యంలో.. విరాట్ కోహ్లి మరో ఐదారేళ్లు మాత్రమే క్రికెట్ ఆడతాడని, గాయాల బెడద కారణంగానే అతను ఆ వ్యాఖ్యలు చేసినట్లు వార్తలు వచ్చాయి.

కోహ్లీ గురించి వస్తున్న వార్తలపై తాజాగా అతని చిన్ననాటి కోచ్ రాజ్‌కుమార్ శర్మ స్పందించాడు. ‘విరాట్ కోహ్లి మరికొన్నేళ్లు మాత్రమే క్రికెట్ ఆడతానని చెప్పడాన్ని నేను సమర్థించను. అతను మరో 10ఏళ్ల పాటు భారత్ తరఫున మ్యాచ్‌లు ఆడాలి. ప్రస్తుతం అతని వయసు 29 కాబట్టి.. 40 ఏళ్ల వరకూ అతను రిటైర్మెంట్ ఆలోచన చేయకూడదు. తాను మరో ఐదారేళ్లు మాత్రమే ఆడతానని అతను పరోక్షంగా చెప్పాడు. కానీ.. మరో 10ఏళ్లపాటు భారత జట్టుని కోహ్లీ వీడడు. అతనికి ఎలాంటి గాయాల బెడద లేదు’ అని రాజ్‌కుమార్ శర్మ స్పష్టం చేశాడు.