కొత్త కోచ్‌ను కోహ్లి ఎంపిక చేసుకోలేడు.. కానీ

భారత క్రికెట్ జట్టు కోచ్‌గా అనిల్ కుంబ్లే వైదొలగడం ఇక లాంఛనమే కావడంతో నూతన కోచ్ ఎవరనేది హాట్ టాపిక్‌గా మారింది. ప్రధాన కోచ్ కోసం వీరేంద్ర సెహ్వాగ్, టామ్ మూడీ సహా ఆరుగురు పోటీలో ఉన్న సంగతి తెలిసిందే. అనిల్ కుంబ్లేను కోచ్‌గా వద్దని చెప్పిన విరాట్ కోహ్లి.. కాబోయే కోచ్‌ను మాత్రం తన ఇష్టానుసారంగా ఎంపిక చేసుకునే అవకాశం లేదని తెలుస్తోంది. కోచ్‌ నియామకంపై సచిన్, గంగూలీ, లక్ష్మణ్‌‌లతో కూడిన క్రికెట్ సలహా సంఘం నిర్ణయం తీసుకోనుంది. ఈ విషయాన్ని అడ్మినిస్ట్రేటర్స్ కమిటీ ఛైర్మన్ వినోద్ రాయ్ స్పష్టం చేశారు.

‘తనకేం కావాలో చెప్పే అవకాశం కోహ్లికి ఉంది కానీ.. తనకు నచ్చిన వ్యక్తిని మాత్రమే కోచ్‌గా నియమించాలని అతడు డిమాండ్ చేయలేడు. కొత్త కోచ్ విషయంలో విరాట్‌కు వీటో పవర్ లేదు. అతడు తన జట్టు సభ్యులను మాత్రమే ఎంపిక చేసుకోగలడు. దీని అర్థం మేం కోహ్లి ప్రాధాన్యాలను పట్టించుకోమని కాదు.. ఏ అభ్యర్థి అయితే కోచ్‌గా బెటరో విరాట్ చెప్పే అవకాశం ఉంటుంది. కానీ తుది నిర్ణయం మాత్రం సలహా సంఘానిదే’ అని బీసీసీఐకి చెందిన సీనియర్ అధికారి ఒకరు వెల్లడించారు.

జూన్ 20 వరకూ అనిల్ కుంబ్లేకు కోచ్‌గా అవకాశం ఉండగా.. ఛాంపియన్స్ ట్రోఫీ ముగిసిన తర్వాత అతడు కోచ్ పదవికి గుడ్ బై చెప్పే అవకాశం ఉంది. కోచ్ రేసులో ఆరుగురు ఉన్నప్పటికీ పోటీ ప్రధానంగా వీరేంద్ర సెహ్వాగ్, టామ్ మూడీ మధ్యనే ఉండనుంది. ఇప్పటి వరకైతే.. శ్రీలంక జట్టు కోచ్‌గా, ఐపీఎల్‌లో సన్‌రైజర్స్ కోచ్‌గా పని చేసిన టామ్ మూడీకే అవకాశాలు ఎక్కువగా ఉన్నాయి.