భారత్‌తో ఈ సిరీస్ కంగారూలకి కఠిన పరీక్ష

భారత్‌తో ఐదు వన్డేల ఈ సిరీస్ ఆస్ట్రేలియా జట్టుకి కఠిన పరీక్షేనని ఆ జట్టు ఫాస్ట్ బౌలర్ జేమ్స్ ఫాల్కనర్ అభిప్రాయపడ్డాడు. సెప్టెంబరు 17 నుంచి వన్డే సిరీస్ ఆరంభంకానున్న నేపథ్యంలో ప్రస్తుతం చెపాక్ స్టేడియంలో ప్రాక్టీస్ చేస్తున్న ఫాల్కనర్ మీడియాతో మాట్లాడాడు. ఇటీవల పసికూన బంగ్లాదేశ్‌‌ చేతిలో తొలి టెస్టు ఓడిపోయిన తర్వాత.. తీవ్ర ఒత్తిడి మధ్య చివరిదైన రెండో టెస్టు గెలిచినట్లు ఫాల్కనర్ గుర్తు చేశాడు. మరోవైపు భారత్ మాత్రం.. శ్రీలంక పర్యటనలో అన్ని మ్యాచ్‌ల్లో గెలిచి మంచి ఊపుమీదుందని ఈ ఫాస్ట్ బౌలర్ వివరించాడు.

‘భారత్ జట్టు ఈ ఏడాది చాలా వన్డే మ్యాచ్‌లు ఆడింది. ఇటీవల శ్రీలంక‌తో ముగిసిన సుదీర్ఘ సిరీస్‌లో కూడా ఓటమి రుచి ఎరుగకుండా టెస్టు, వన్డే, టీ20 సిరీస్‌లోనూ వైట్‌వాష్ సాధించింది. మరోవైపు మా జట్టు పరిస్థితి ఇప్పుడు కొంచెం భిన్నంగా ఉంది. కాబట్టి.. ఈ సిరీస్‌ ఆస్ట్రేలియాకి కఠిన పరీక్షలాంటిది. కానీ.. మా జట్టంతా ఈ పరీక్ష ఎదుర్కొనేందుకు ఉత్సాహంగా ఎదురుచూస్తోంది. గతంలో మేము భారత్‌లో మెరుగైన ప్రదర్శన చేశాం. ఏది ఏమైనా.. ఈ సిరీస్‌ మాత్రం రసవత్తరంగా జరగడం ఖాయం’ అని ఫాల్కనర్ ధీమా వ్యక్తం చేశాడు.