ఉతికారేసిన అజామ్.. వరల్డ్ ఎలెవెన్‌పై పాక్ బోణీ

ఎనిమిదేళ్ల సుధీర్ఘ విరామం తర్వాత అంతర్జాతీయ స్టార్ ఆటగాళ్లు తమ దేశానికి వచ్చారన్న ఆనందం.. దేశంలో అంతర్జాతీయ క్రికెట్‌ను పునరుద్ధరించాలనే గట్టి పట్టుదల.. ఇవే పాకిస్థాన్ క్రికెటర్లు అదరగొట్టడానికి కారణం కావచ్చు. వివిధ జట్లకు చెందిన అంతర్జాతీయ ఆటగాళ్లతో కూడిన వరల్డ్‌ ఎలెవన్‌తో మూడు టీ20ల ఇండిపెండెన్స్‌ కప్‌కు శ్రీకారం చుట్టిన పాకిస్థాన్‌.. సిరీస్‌లో బోణీ కొట్టింది. లాహోర్‌లో మంగళవారం రాత్రి జరిగిన తొలి టీ20లో 20 పరుగుల తేడాతో వరల్డ్‌ ఎలెవన్‌ను పాకిస్థాన్ ఓడించింది.

టాస్‌ గెలిచిన వరల్డ్ ఎలెవెన్ కెప్టెన్ డుప్లెసిస్ ఫీల్డింగ్ ఎంచుకోవడంతో మొదట బ్యాటింగ్‌ చేసిన పాక్‌ నిర్ణీత 20 ఓవర్లలో 5 వికెట్లు నష్టపోయి 197 పరుగుల భారీ స్కోరు చేసింది. బాబర్‌ అజామ్‌ అద్భుతంగా ఆడాడు. ఎలెవన్ బౌలర్లను ఉతికారేసిన అజామ్ 52 బంతుల్లో 86 పరుగులు (10 ఫోర్లు, రెండు సిక్సులు) చేసి జట్టు విజయంలో కీలక పాత్ర పోషించాడు. షోయబ్‌ మాలిక్‌ (38), అహ్మద్‌ షెజాద్‌ (39) మెరిశారు. కెప్టెన్ సర్ఫరాజ్ అహ్మద్ (4) నిరాశపరిచినా.. చివర్లో ఇమాద్ వసీం (15 నాటౌట్) భారీ సిక్సర్లతో స్కోరుని 190 దాటించగలిగాడు.

అనంతరం బ్యాటింగ్‌కు వచ్చిన వరల్డ్‌ ఎలెవన్‌ నిర్ణీత ఓవర్లలో 7 వికెట్లు కోల్పోయి 177 పరుగులే చేసింది. ఆ జట్టులో హషీమ్‌ ఆమ్లా (26), టిమ్‌ పైన్‌ (25), డుప్లెసిస్‌ (29) ఇన్నింగ్స్‌లను బాగానే ఆరంభించినా ఎవరూ పెద్ద స్కోర్లు చేయలేకపోయారు. చివర్లో డారెన్‌ సామి (29 నాటౌట్‌) పోరాడినా ఫలితం లేకపోయింది. సాధించాల్సిన రన్‌రేట్‌ బాగా పెరిగిపోవడంతో ముందే వరల్డ్‌ ఎలెవన్‌ ఓటమి ఖరారైపోయింది. పాక్‌ బౌలర్లలో సోహైల్‌ ఖాన్‌, రయీస్‌, షాదాబ్‌ ఖాన్‌ రెండేసి వికెట్లు తీశారు. అజామ్‌కు ‘మ్యాన్ ఆఫ్ ది మ్యాచ్’ అవార్డు దక్కింది. చాన్నాళ్ల తర్వాత అంతర్జాతీయ స్టార్లు పాక్‌లో మ్యాచ్‌ ఆడటంతో స్టేడియం లోపల, బయట పండగ వాతావరణం నెలకొంది. సిరీస్‌లో మిగతా రెండు మ్యాచ్‌లు బుధ, గురువారాల్లో జరుగుతాయి.