హసన్ అలీ.. భారత్‌పై పది వికెట్లు పడగొట్టావా?

ఆసియా కప్ తుది దశకు చేరింది. భారత్, పాక్ మధ్య ఇప్పటి వరకు రెండు మ్యాచ్‌లు జరగా.. రెండూ ఏకపక్షంగా సాగాయి. తొలి మ్యాచ్‌లో 8 వికెట్ల తేడాతో గెలుపొందిన భారత్.. రెండో మ్యాచ్‌లో 9 వికెట్ల తేడాతో విజయం సాధించింది. టీమిండియా గెలుపు ఫ్యాన్స్‌కి సంతోషం కలిగించింది. కానీ దాయాది జట్ల మధ్య పోరు మాత్రం ఆశించిన స్థాయిలో ఆసక్తికరంగా సాగలేదు.

ఈ టోర్నీ ప్రారంభానికి ముందు పాక్ క్రికెటర్లు, మాజీలు తెగ ప్రగల్భాలు పలికారు. భారత జట్టుపై మెరుగ్గా రాణిస్తానని, పదికి పది వికెట్లు పడగొట్టాలని ఉందని హసన్ అలీ చెప్పుకొచ్చాడు. కానీ రెండు మ్యాచ్‌ల్లోనూ అతడికి ఒక్క వికెట్ కూడా దక్కలేదు. ఆ మాటకొస్తే పాక్ బౌలర్లు తీసింది రెండంటే రెండు వికెట్లు. అది కూడా మొదటి మ్యాచ్‌లోనే.

దాయాది జట్ల మధ్య సమరానికి ముందు భారత బౌలింగ్ లైనప్‌ను కామెంట్ చేస్తూ షోయబ్ అక్తర్ వ్యాఖ్యలు చేశాడు. ఫకర్ జమాన్ భారత్ బౌలింగ్‌ను అవలీలగా ఎదుర్కుంటాడని, డబుల్ సెంచరీ చేస్తాడని జోస్యం చెప్పాడు. కానీ తొలి మ్యాచ్‌లో డకౌటయిన జమాన్, రెండో మ్యాచ్‌లో 31 పరుగులు చేసి కుల్దీప్ బౌలింగ్‌లో వెనుదిరిగాడు. దీంతో పాక్ ఆటగాళ్లు, మాజీలను టార్గెట్ చేస్తూ భారత క్రికెట్ అభిమానులు ట్వీట్లు చేస్తున్నారు.