Babar Azam: స్వాతంత్య్ర దినోత్సవ వేడుకల వేళ.. బాబర్ ఆజమ్‌కు పాకిస్థాన్ పురస్కారం

పాకిస్థాన్ 75వ స్వాతంత్య్ర వేడుకల సందర్భంగా ఆ దేశ పురుషుల క్రికెట్ జట్టు కెప్టెన్ బాబర్ ఆజమ్‌కు సితారా-ఏ-పాకిస్థాన్ పురస్కారం లభించింది. మహిళల జట్టు కెప్టెన్‌ బిస్మాహ్ మరూఫ్‌కు తంఘా-ఏ-పాకిస్థాన్ పురస్కారాన్ని ప్రదానం చేశారు. పాకిస్థాన్ 75వ వార్షికోత్సవం సందర్భంగా పౌర పురస్కారాలు అందుకున్న మసూద్ జాన్ (అంధ క్రికెటర్), బాబర్ ఆజమ్, బిస్మా మరూఫ్‌లను అభినందిస్తూ పాకిస్థాన్ క్రికెట్ బోర్డు ట్వీట్ చేసింది.

వరల్డ్ నంబర్ వన్ వన్డే, టీ20 బ్యాట్స్‌మెన్ అయిన బాబర్ ఆజమ్ ప్రస్తుతం అద్భుతమైన ఫామ్‌లో ఉన్నాడు. వన్డేల్లో రెండు పర్యాయాలు వరుసగా మూడు సెంచరీలు నమోదు చేసిన తొలి ఆటగాడిగా బాబర్ రికార్డ్ క్రియేట్ చేశాడు. గత ఏడాది వరుసగా మూడు సెంచరీలు చేసిన ఆజమ్.. వన్డేల్లో వేగంగా 17 శతకాలు పూర్తి చేసిన బ్యాట్స్‌మెన్‌గా.. వేగంగా వెయ్యి పరుగులు చేసిన కెప్టెన్‌గా రికార్డ్ క్రియేట్ చేశాడు.

బాబర్ సారథ్యంలోని పాకిస్థాన్ జట్టు యూఏఈలో జరిగిన 2021 టీ20 వరల్డ్ కప్‌లో సెమీఫైనల్ చేరింది. ఐసీసీ అతణ్ని లీడర్ ఆఫ్ ది టీమ్ ఆఫ్ ది టోర్నీగా ప్రకటించింది.

2015లో వన్డేల్లో అరంగేట్రం చేసిన బాబర్.. పాక్ తరఫున వన్డేల్లో అత్యధిక పరుగులు చేసిన ఆటగాళ్ల జాబితాలో 15వ స్థానంలో ఉన్నాడు. 89 మ్యాచ్‌ల్లో 4442 రన్స్ చేసిన బాబర్.. 74 టీ20ల్లో 2686 రన్స్ చేశాడు. ఇందులో ఒక సెంచరీ 26 హాఫ్ సెంచరీలున్నాయి.

పాక్ తరఫున టెస్టుల్లో అత్యధిక పరుగులు చేసిన ఆటగాళ్ల జాబితాలో బాబర్ 19వ స్థానంలో ఉన్నాడు. 42 టెస్టులు ఆడిన అతడు అతడు 3122 పరుగులు చేయగా.. అందులో ఏడు సెంచరీలు ఉన్నాయి. ఆసియా కప్‌లో బాబర్ ఆజమ్ పాకిస్థాన్‌ జట్టును ముందుకు నడిపించనున్నాడు. ఆగస్టు 28న భారత్, పాక్ మధ్య జరిగే మ్యాచ్ కోసం ఇరు దేశాల ఫ్యాన్స్ ఆసక్తిగా ఎదురు చూస్తున్నారు.