PAK vs ENG: పాక్ ఓపెనర్లు @203 నాటౌట్.. వరల్డ్ రికార్డ్ బ్రేక్.. ధావన్-రోహిత్ రికార్డ్ బద్దలు!

పాకిస్థాన్ ఓపెనర్లు బాబర్ ఆజమ్, మహ్మద్ రిజ్వాన్ ఇంగ్లాండ్ బౌలర్లతో ఆటాడుకున్నారు. కరాచీ వేదికగా జరిగిన రెండో టీ20లో ముందుగా బ్యాటింగ్ చేసిన ఇంగ్లాండ్ 20 ఓవర్లలో 5 వికెట్ల నష్టానికి 199 పరుగులు చేయగా.. పాకిస్థాన్ ఓపెనర్లు బాబర్, రిజ్వాన్ ఇద్దరూ కలిసి అజేయంగా 203 పరుగులు చేశారు. దీంతో పాకిస్థాన్ మరో మూడు బంతులు మిగిలి ఉండగానే.. ఇంగ్లాండ్‌పై పది వికెట్ల తేడాతో ఘన విజయం సాధించింది. ఈ మ్యాచ్‌లో బాబర్ ఆజమ్ 66 బంతుల్లో 110 పరుగులతో నాటౌట్‌గా నిలవగా.. రిజ్వాన్ 51 బంతుల్లో 88 పరుగులతో నాటౌట్‌గా నిలిచాడు. ఈ విజయంతో ఏడు టీ20ల సిరీస్‌ను పాకిస్థాన్ 1-1తో సమం చేసింది.

అంతర్జాతీయ టీ20ల్లో ఛేజింగ్‌లో అత్యధిక భాగస్వామ్యాన్ని నెలకొల్పిన జోడీగా పాకిస్థాన్ ఓపెనర్లు బాబర్, రిజ్వాన్ రికార్డ్ క్రియేట్ చేశారు. 2021లో దక్షిణాఫ్రికాపై 197 పరుగులు జోడించిన వీరూ.. తమ రికార్డును అధిగమించారు.

టీ20ల్లో ఏ వికెట్‌కైనా అత్యధిక భాగస్వామ్యం నెలకొల్పిన జోడీగా బాబర్, రిజ్వాన్ రికార్డ్ క్రియేట్ చేశారు. వీరిద్దరూ 36 ఇన్నింగ్స్‌ల్లో 56.73 సగటుతో 1929 పరుగులు జోడించారు. ఇందులో ఏడు సెంచరీలు ఉండగా.. ఆరు హాఫ్ సెంచరీలున్నాయి. ఈ క్రమంలో వీరిద్దరూ భారత ఓపెనర్లు శిఖర్ ధావన్, రోహిత్ శర్మ రికార్డును బ్రేక్ చేశారు. ధావన్-రోహిత్ జోడీ 52 ఇన్నింగ్స్‌ల్లో 33.51 యావరేజ్‌తో 1743 పరుగులు జోడించింది.

ఇంగ్లాండ్‌పై సెంచరీతో సత్తా చాటిన బాబర్.. మరో 105 పరుగులు చేస్తే అంతర్జాతీయ టీ20ల్లో 3 వేల పరుగులు చేసిన తొలి పాకిస్థాన్ బ్యాటర్‌గా రికార్డ్ క్రియేట్ చేస్తాడు. టీ20ల్లో 8 వేల పరుగులు చేసిన రెండో పాకిస్థాన్ బ్యాటర్‌గా బాబర్ నిలిచాడు. ఇంతకు ముందు పాక్ నుంచి షోయబ్ మాలిక్ మాత్రమే టీ20ల్లో 8 వేలకుపైగా పరుగులు సాధించాడు.