బ్యాటింగ్‌లో పాక్ కెప్టెన్ సాహసం.. వైరల్

ఆస్ట్రేలియాతో అబుదాబి వేదికగా జరుగుతున్న రెండో టెస్టు మ్యాచ్‌లో పాకిస్థాన్ కెప్టెన్ సర్ఫరాజ్ అహ్మద్ అసాధారణ ఇన్నింగ్స్‌తో ఆకట్టుకున్నాడు. స్పిన్నర్లకి అతిగా అనుకూలించిన పిచ్‌పై ఆసీస్ స్పిన్నర్ నాథన్ లయన్ ఆరు బంతుల్లోనే ఏకంగా నాలుగు వికెట్లు పడగొట్టడంతో ఒకానొక దశలో 57/5తో పాక్ జట్టు పీకల్లోతు కష్టాల్లో పడింది. ఈ దశలో ఓపెనర్ ఫకార్ జమాన్ (94: 198 బంతుల్లో 8x4, 1x6)తో కలిసి కీలక ఇన్నింగ్స్ ఆడిన సర్ఫరాజ్ అహ్మద్ (94: 129 బంతుల్లో 7x4) ఆరో వికెట్‌కి ఏకంగా 147 పరుగుల భాగస్వామ్యం నెలకొల్పాడు. దీంతో.. పాక్ జట్టు తొలి ఇన్నింగ్స్‌లో 282 పరుగులు చేయగలిగింది.

ఆఫ్ స్టంప్‌కి దూరంగా గింగిరాలు తిరిగే బంతుల్ని నాథన్ లయన్ వరుసగా సంధిచడంతో.. మ్యాచ్‌లో కాసేపు సర్ఫరాజ్ అహ్మద్ తన బ్యాటింగ్ స్టాన్స్‌ని మార్చుకున్నాడు. పూర్తిగా మూడు స్టంప్‌లను వదిలేసి.. బ్యాక్‌ఫుట్‌పైకి వెళ్లి లయన్ బంతుల్ని ఎదుర్కొని పరుగులు రాబట్టాడు. వాస్తవానికి అప్పటికే పాక్ జట్టు ఐదు వికెట్లు చేజార్చుకున్న నేపథ్యంలో.. ఇలా సర్ఫరాజ్ వికెట్లను పూర్తిగా వదిలేసి బ్యాటింగ్ చేయాలనుకోవడం పెద్ద సాహసమే..! ఇప్పుడు సర్ఫరాజ్ బ్యాటింగ్‌ స్టాన్స్‌పై ట్విట్టర్ అభిమానులు సరదాగా స్పందిస్తున్నారు.