టీమిండియా విజయ రహస్యం ఇదే..!

భారత్ జట్టు గత కొంతకాలంగా వరుస సిరీస్‌ల్లో విజయాలు సాధిస్తూ జైత్రయాత్ర సాగిస్తోంది.. దీనికి కారణం జట్టు‌లోని క్రికెటర్లందరూ కలిసికట్టుగా గెలుపు కోసం శ్రమించడమేనని ఓపెనర్ రోహిత్ శర్మ వెల్లడించాడు. న్యూజిలాండ్‌తో వన్డే సిరీస్‌ కోసం ప్రస్తుతం సిద్ధమవుతున్న రోహిత్ శర్మ మీడియాతో సోమవారం మాట్లాడాడు. ఇటీవల ఆస్ట్రేలియాతో ముగిసిన వన్డే సిరీస్‌లో రోహిత్ శర్మ ఫామ్ చాటడంతో భారత్ ఐదు వన్డేల సిరీస్‌ని 4-1తేడాతో చేజిక్కించుకున్న విషయం తెలిసిందే.

‘టీమిండియా విజయాల ఘనత జట్టులోని అందరిదీ. ఎందుకంటే.. భారత్ జట్టు వరుసగా ఆరు సిరీస్‌ల్లోనూ గెలుపొందింది. ఒకరినొకరు సహకరించుకుంటూ సమష్టిగా ఆడటంతోనే ఈ విజయాలు సాధ్యమయ్యాయి. ఒక టోర్నీని గెలుపొందాలంటే ఒకరు లేదా ఇద్దరు ఆటగాళ్లు రాణిస్తే.. సరిపోదు. జట్టులోని అందరూ ఆ విజయానికి తోడ్పడాలి. ప్రస్తుతం భారత్ జట్టు కూడా అలానే ఒక లక్ష్యం దిశగా ముందుకు వెళ్తోంది. ఇక 2019 ప్రపంచకప్‌ అంటారా..? దానికి ఇంకా ఏడాదన్నర సమయం ఉంది. అయితే.. మా అంతిమ టార్గెట్ మాత్రం ఈ మెగా టోర్నీనే’ అని రోహిత్ శర్మ వివరించాడు.