మైదానంలోకి మహిళా అంపైర్..!

మైదానంలోకి మహిళా అంపైర్లు రాబోతున్నారు. వారు కేవలం మహిళలు ఆడే క్రికెట్ మ్యాచ్‌లకే పరిమితం కాకుండా.. పురుషుల మ్యాచ్‌‌లకి కూడా అంపైరింగ్ చేయబోతున్నారు. తాజాగా ఆస్ట్రేలియాకి చెందిన మహిళా అంపైర్ పొలోసాక్‌ ఓ పురుషుల మ్యాచ్‌కి అంపైరింగ్‌ చేసి అరుదైన ఘనతని అందుకుంది. 29 ఏళ్ల పొలోసాక్.. ఆస్ట్రేలియా ఎలెవన్, న్యూ సౌత్ వేల్స్ మధ్య జరిగిన మ్యాచ్‌కి అంపైర్‌గా పనిచేసింది. పురుషుల ఫస్ట్‌క్లాస్ స్థాయి మ్యాచ్‌ల్లో ఒక మహిళ అంపైర్‌గా పనిచేయడం క్రికెట్ చరిత్రలో ఇదే తొలిసారి.

‘నేను ఎప్పుడూ క్రికెట్ ఆడలేదు. కానీ.. మ్యాచ్‌లు చూస్తుండేదాన్ని. ఈ ఆసక్తిని గమనించిన మా నాన్న నన్ను ఓ అంపైర్ కోర్సులో చేర్చారు. పురుషుల ఫస్ట్‌క్లాస్ మ్యాచ్‌కి అంపైరింగ్ చేసే అవకాశం రావడం గొప్పగా భావిస్తున్నాను. ఈ రంగంలో నేను మెరుగ్గా రాణించగలిగితే.. మరి కొంత మందికి మార్గదర్శకంగా ఉంటుంది’ అని పొలోసాక్ వివరించింది. అతి తక్కువ కాలంలోనే ఎలైట్ లెవల్ స్థాయికి పొలోసాక్ చేరుకోగలిగిందని.. ఇదే ప్రతిభని కొనసాగిస్తే పురుషుల అంతర్జాతీయ మ్యాచ్‌లకి కూడా ఆమె అంపైరింగ్ చేయగలదని క్రికెట్ ఆస్ట్రేలియా సీఈవో ధీమా వ్యక్తం చేశారు.