IND vs SL 3rd T20: టీ20ల్లో నెం.1 రికార్డ్‌కి వికెట్ దూరంలో బుమ్రా

భారత ఫాస్ట్ బౌలర్ జస్‌ప్రీత్ బుమ్రా అరుదైన రికార్డ్‌కి అడుగు దూరంలో ఉన్నాడు. శ్రీలంకతో ఇండోర్ వేదికగా మంగళవారం రాత్రి ముగిసిన రెండో టీ20 మ్యాచ్‌తో టీమిండియాలోకి రీఎంట్రీ ఇచ్చిన బుమ్రా.. 4 ఓవర్లు వేసి ఒక వికెట్ మాత్రమే పడగొట్టగలిగాడు. వెన్ను గాయంతో దాదాపు మూడు నెలలు క్రికెట్‌కి దూరంగా ఉన్న ఈ పేసర్ రీఎంట్రీలో మునుపటి బౌలింగ్ పదును కనిపించలేదు. దీంతో మ్యాచ్‌లో బుమ్రా వేసిన ఆఖరి ఓవర్‌ చివరి మూడు బంతుల్నీ శ్రీలంక లోయర్ ఆర్డర్ బ్యాట్స్‌మెన్ హసరంగ వరుసగా 4, 4, 4గా మలిచేశాడు.

శ్రీలంకతో పుణె వేదికగా శుక్రవారం రాత్రి 7 గంటలకి ఆఖరి టీ20 మ్యాచ్ జరగనుండగా.. ఈ మ్యాచ్‌లోనైనా బుమ్రా లయ అందుకోవాలని టీమిండియా ఆశిస్తోంది. పుణె టీ20లో బుమ్రా ఒక వికెట్ పడగొట్టగలిగితే..? భారత్ తరఫున టీ20ల్లో అత్యధిక వికెట్లు పడగొట్టిన బౌలర్‌గా రికార్డుల్లో నిలవనున్నాడు. 2016లో అంతర్జాతీయ టీ20ల్లోకి అరంగేట్రం చేసిన బుమ్రా.. ఇప్పటి వరకూ 43 మ్యాచ్‌లాడి 52 వికెట్లు పడగొట్టాడు.

టీమిండియా తరఫున టీ20ల్లో అత్యధిక వికెట్లు పడగొట్టిన బౌలర్ల జాబితాని ఓసారి పరిశీలిస్తే..? మణికట్టు స్పిన్నర్ యుజ్వేందర్ చాహల్, ఆఫ్ స్పిన్నర్ రవిచంద్రన్ అశ్విన్‌తో పాటు బుమ్రా కూడా సరిగ్గా 52 వికెట్లతో సంయుక్తంగా అగ్రస్థానంలో కొనసాగుతున్నారు. దీంతో.. పుణె టీ20లో బుమ్రా ఒక్క వికెట్ పడగొట్టినా..? 53 వికెట్లతో నెం.1 స్థానాన్ని దక్కించుకోనున్నాడు. అయితే.. చాహల్ 52 వికెట్ల మైలురాయిని కేవలం 36 మ్యాచ్‌ల్లోనే అందుకోగా.. అశ్విన్ 46 మ్యాచ్‌ల్లో చేరుకున్నాడు.