హర్మన్‌ప్రీత్‌కు డీఎస్పీ.. మిథాలీకి బీఎండబ్ల్యూ

తృటిలో ప్రపంచకప్‌ను చేజార్చుకున్నా అమ్మాయిలు భారతీయుల మనసులు గెలుచుకున్నారు. ఎలాంటి అంచనాలు లేకుండా బరిలోకి దిగి ఫైనల్‌కు చేరుకున్నారు. తుదిపోరులో చివరి వరకు పోరాడి ఓడిపోయారు. కానీ పోరాట పటిమతో ఆకట్టుకున్నారు. ఇదిలా ఉంటే.. సెమీస్‌లో ఆస్ట్రేలియా అద్భుతంగా ఆడి 115 బంతుల్లో 171 పరుగులు చేసి నాటౌట్‌గా నిలిచిన హర్మన్‌ప్రీత్‌ కౌర్‌కు పంజాబ్‌ ప్రభుత్వం డీఎస్పీ ఉద్యోగం ఇస్తున్నట్లు ప్రకటించింది.

టీం ఇండియా ప్రపంచకప్‌ ఫైనల్‌కు చేరడంలో కీలకపాత్ర పోషించిన హర్మన్‌ అందరికీ గర్వకారణమని పంజాబ్ సీఎం అమరీందర్ సింగ్ అన్నారు. అందుకే ఆమెకు పోలీసు శాఖలో డీఎస్పీ ఉద్యోగం ఇస్తున్నట్లు చెప్పారు. అలాగే రూ.5 లక్షల నజరానా కూడా ప్రకటించారు. ఆదివారం హర్మన్‌ప్రీత్ తల్లిదండ్రులను తన వద్దకు పిలిపించుకున్న సీఎం.. వారిని అభినందించారు.

మరోవైపు కెప్టెన్‌ మిథాలీ రాజ్‌కు బీఎండబ్ల్యూ కారును బహుమతిగా అందనుంది. తెలంగాణ బ్యాడ్మింటన్‌ సంఘం ఉపాధ్యక్షుడు చాముండేశ్వరినాథ్‌.. మిథాలీకి బీంఎడబ్ల్యూ కారును ప్రకటించాడు. 2007లో మిథాలీకి షెవర్లె కారును ఇచ్చిన చాముండి.. ఈసారి రూ.40లక్షల విలువైన బీఎండబ్ల్యూను బహుమతిగా ఇస్తున్నారు. క్రీడాకారులను పోత్రహిస్తూ వారికి కార్లను బహుమతులుగా ఇవ్వడం చాముండికి కొత్తేమీ కాదు. కిందటేడాది రియో ఒలింపిక్స్‌లో సత్తాచాటిన పి.వి. సింధు, సాక్షి మాలిక్‌, దీపా కర్మాకర్‌, బ్యాడ్మింటన్ కోచ్‌ గోపీచంద్‌లకు సచిన్‌ టెండూల్కర్ చేతుల మీదుగా బీఎండబ్ల్యూ కార్లు అందించిన సంగతి తెలిసిందే.