ఐపీఎల్: ఆ క్రికెటర్ల తీరుపై నొచ్చుకున్న ద్రవిడ్

ఐపీఎల్ పదో సీజన్ మరో వారం రోజుల్లో ఆరంభంకాబోతోంది. టోర్నీలోని ఏడు జట్లు ఇప్పటికే వ్యూహాలతో సిద్ధమైపోగా దిల్లీ డేర్ డెవిల్స్ మాత్రం ఇంకా ఆటగాళ్ల సర్దుబాటు దగ్గరే ఉండిపోయింది. వారం రోజుల వ్యవధిలోనే ఆ జట్టులోని ఇద్దరు కీలక ఆటగాళ్లు ఐపీఎల్‌కి దూరమవుతున్నట్లు ప్రకటించడంతో ప్రస్తుతం దిల్లీ డేర్‌డెవిల్స్ ‌ఇబ్బందుల్లో పడింది. వ్యక్తిగత కారణాలతో ఓపెనర్ డికాక్, గాయం కారణంగా ఆల్‌రౌండర్ జేపీ డుమిని ఈ సీజన్ నుంచి తప్పుకుంటున్నట్లు ప్రకటించిన విషయం తెలిసిందే. ఈ ఇద్దరూ జట్టుకు దూరమవడంతో దిల్లీ డేర్‌డెవిల్స్ కోచ్ రాహుల్ ద్రవిడ్ ప్రస్తుతం పునరాలోచనలో పడ్డారు. ఈ ఇద్దరు క్రికెటర్లు వేలం జరగకముందే తాము అందుబాటులో ఉండమని చెప్పుంటే పరిస్థితి మరోలా ఉండేదని ద్రవిడ్ అభిప్రాయపడ్డారు.

‘డికాక్, జేపీ డుమిని లాంటి నాణ్యమైన క్రికెటర్ల సేవలను కోల్పోవడం దిల్లీ డేర్‌డెవిల్స్‌కి పెద్ద ఎదురుదెబ్బ. ఈ క్రికెటర్లు టోర్నీకి అందుబాటులో ఉండరని ఐపీఎల్ వేలం జరగక ముందే తెలుసుంటే ప్రత్యామ్నాయం వెతుక్కునేందుకు అవకాశం ఉండేది. కానీ ఇప్పుడు ఏం చేయలేని పరిస్థితి. అయితే ఇప్పటికీ శ్లామ్ బిల్లింగ్స్ లాంటి ఆటగాళ్లు జట్టులో ఉన్నారు. ఆల్‌రౌండర్ డుమిని స్థానాన్ని కోర్ అండర్సన్ లేదా ఏంజెలో మాథ్యూస్‌తో భర్తీ చేయచ్చు.. కానీ ఓపెనర్ డికాక్‌ని స్థానాన్ని భర్తీ చేయాలంటేనే కష్టం. అతను జట్టులో ప్రధాన బ్యాట్స్‌మెన్. అందుకే డికాక్ లేని లోటు ప్రస్తుతం పూడ్చలేనిది ’ అని ద్రవిడ్ వివరించాడు. ఐపీఎల్ పదో సీజన్ ఏప్రిల్ 5 నుంచి ఆరంభంకాబోతోంది. గత సీజన్‌లో డికాక్ తన భీకర హిట్టింగ్‌తో దిల్లీకి భారీ స్కోర్లు అందించాడు.