Shardulkar: సచిన్ తరహాలో కవర్‌ డ్రైవ్ చూసి.. శార్ధూల్ ఠాకూర్‌కి ఫీల్డింగ్ కోచ్ నిక్‌నేమ్

ఆస్ట్రేలియా గడ్డపై దొరికిన అవకాశాన్ని ఫాస్ట్ బౌలర్ శార్ధూల్ ఠాకూర్ రెండుజేతులా వినియోగించుకున్నాడు. బ్రిస్బేన్ వేదికగా జరిగిన చివరి టెస్టుకి గాయం కారణంగా ఫాస్ట్ బౌలర్ జస్‌ప్రీత్ బుమ్రా దూరమవడంతో శార్ధూల్ ఠాకూర్‌కి తుది జట్టులో చోటు లభించింది. ఆ మ్యాచ్‌ తొలి ఇన్నింగ్స్‌లో బంతితో మూడు వికెట్లు పడగొట్టిన ఠాకూర్.. బ్యాటింగ్‌లోనూ సత్తాచాటాడు. తొలి ఇన్నింగ్స్‌లో వాషింగ్టన్ సుందర్‌ (62)తో కలిసి ఏడో వికెట్‌కి 123 పరుగుల భాగస్వామ్యం నెలకొల్పిన శార్ధూల్ ఠాకూర్ (67: 115 బంతుల్లో 9x4, 2x6) ఆ ఇన్నింగ్స్‌కి టాప్ స్కోరర్‌గా నిలిచాడు.

బ్రిస్బేన్ టెస్టుకి ముందు కేవలం ఒకే ఒక టెస్టు మ్యాచ్.. అది కూడా 11 బంతులు వేసిన అనుభవం మాత్రమే అతనికి ఉంది. గాయం కారణంగా ఆ మ్యాచ్‌ ఆరంభంలోనే మైదానం వీడిన ఠాకూర్.. దాదాపు రెండేళ్ల తర్వాత వచ్చిన అవకాశాన్ని చక్కగా వినియోగించుకున్నాడు. మరీ ముఖ్యంగా.. టాప్ ఆర్డర్ బ్యాట్స్‌మెన్ తరహాలో అతను ఆస్ట్రేలియా ఫాస్ట్ బౌలర్లని ఎదుర్కొన్న తీరుకి పెద్ద ఎత్తున ప్రశంసలు లభించాయి. ఠాకూర్ ఇన్నింగ్స్‌లో కవర్ డ్రైవ్‌లు, ప్లిక్ షాట్స్‌తో పాటు బ్యాక్ ఫుట్ పంచ్ షాట్‌లు కూడా ఉన్నాయి.


భారత దిగ్గజ క్రికెటర్ సచిన్ టెండూల్కర్‌ని తలపించిన అతని కవర్‌ డ్రైవ్‌ని చూసిన టీమిండియా ఫీల్డింగ్ కోచ్ ఆర్. శ్రీధర్.. శార్ధూల్ ఠాకూర్‌కి ఒక నిక్‌నేమ్ కూడా పెట్టాడట. అశ్విన్‌ యూట్యూబ్ ఛానల్‌కి ఇచ్చిన ఇంటర్వ్యూలో ఈ విషయాన్ని తాజాగా శ్రీధర్ బహిర్గతం చేశాడు. ఇంతకీ శ్రీధర్ పెట్టిన నిక్‌నేమ్ ఏంటంటే..? Shardulkar. కవర్‌ డ్రైవ్ ముచ్చటగా శార్ధూల్ ఆడటంతో Shardulకి చివర్లో Tendulkar ఆఖరి మూడు అక్షరాల్ని యాడ్ చేశాడు. సచిన్ పేరునే ఇక్కడ శ్రీధర్ తీసుకోవడానికి మరో కారణం కూడా ఉంది. శార్ధూల్ ఠాకూర్ అరంగేట్రం మ్యాచ్‌లోనే నెం.10 జెర్సీని ధరించాడు. కానీ.. ఆ తర్వాత తీవ్ర స్థాయిలో విమర్శలు రావడంతో జెర్సీ నెంబరుని మార్చుకున్నాడు. ఇంతకీ ఆ 10 నెంబరు జెర్సీ ఎవరిదో తెలుసు కదా..? సచిన్ టెండూల్కర్.