రబాడ శిక్ష తగ్గింపుపై స్పందించిన స్మిత్

దక్షిణాఫ్రికా, ఆస్ట్రేలియా మధ్య జరుగుతున్న టెస్టు సిరీస్‌‌ ఆట కంటే.. గొడవలతోనే ఎక్కువగా వార్తల్లో నిలుస్తోంది. మొదట డేవిడ్ వార్నర్, డికాక్ డ్రెస్సింగ్ రూముకి వెళుతూ గొడవపడగా.. ఆ తర్వాత స్టీవ్‌స్మిత్‌ని మైదానంలో భుజంతో ఢీకొట్టి రబాడ కవ్వింపు చర్యలకి దిగాడు. స్టీవ్‌స్మిత్ వికెట్ తీసిన రబాడ.. అతను పెవిలియన్‌కి వెళ్తుంటే ఉద్దేశపూర్వకంగానే వెళ్లి తన భుజంతో అతడ్ని ఢీకొట్టాడు. దీంతో.. క్రమశిక్షణ తప్పిన రబాడ మ్యాచ్ ఫీజులో 50 శాతం కోత విధించడంతో పాటు.. అతని ఖాతాలో మూడు డీమెరిట్ చేరుస్తూ మ్యాచ్ రిఫరీ నిర్ణయం తీసుకున్నాడు. అప్పటికే ఐదు డీమెరిట్ పాయింట్లతో ఉన్న రబాడ ఖాతాలోకి మరో మూడు పాయింట్లు చేరడంతో అతనిపై రెండు టెస్టుల నిషేధం పడింది. అయితే.. ఈ శిక్షపై రబాడ అప్పీల్ చేసుకోగా.. విచారణ జరిపిన కమిషనర్.. వికెట్ తీసిన ఆనందంలో అలా ఢీకొట్టాడే తప్ప ఉద్దేశపూర్వకంగా కాదని తేల్చి.. మ్యాచ్ ఫీజుని 25 శాతానికి, రెండు డీమెరిట్ పాయింట్లను తగ్గించాడు. దీంతో.. అతనిపై ఉన్న నిషేధం తొలగిపోయి.. మూడో టెస్టు ఆడేందుకు మార్గం సుగుమమైంది.


మైదానంలో క్రమశిక్షణ తప్పిన రబాడకి విధించిన శిక్ష తగ్గించడంపై స్టీవ్‌స్మిత్ స్పందించాడు ‘వీడియో ఫుటేజీల్లో చూపించిన దానికంటే గట్టిగానే రబాడ నా భుజాన్ని ఢీకొట్టాడు. కానీ.. ఆ నొప్పి నన్నుఎక్కువగా బాధించలేదు. మ్యాచ్‌ సమయంలో ఆ స్థాయి భావోద్వేగాన్ని నేను ఊహించిందే. అయితే.. వికెట్ పడగొట్టిన తర్వాత కూడా మితిమీరిన సంబరాలు అవసరమా..? ఎట్టకేలకి మా ఇద్దరి మధ్య ఆధిపత్య పోరులో అతనే గెలిచాడు’ అని ఆస్ట్రేలియా కెప్టెన్ వెల్లడించాడు. దక్షిణాఫ్రికా, ఆస్ట్రేలియా మధ్య మూడో టెస్టు మ్యాచ్ గురువారం నుంచి జరగనుంది. నాలుగు టెస్టుల ఈ సిరీస్‌లో ఇరు జట్లూ చెరొక టెస్టును గెలిచాయి.