ద్రావిడ్ ఇంటర్వ్యూ: నేను కలిసి ఆడిన బెస్ట్ బ్యాట్స్‌మెన్ సచిన్

ఇటీవలే హాల్ ఆఫ్ ఫేమ్ జాబితాలో చోటు దక్కించుకున్న మిస్టర్ డిపెండబుల్ రాహుల్ ద్రావిడ్ యువ ఆటగాళ్లను సానబెట్టే పనిలో నిమగ్నమయ్యాడు. ఆటగాడిగా టీమిండియాకు అద్భుత విజయాలు అందించిన ద్రావిడ్.. కోచ్‌గా భారత అండర్-19 జట్టుకు వరల్డ్ కప్ అందించాడు. వాల్ అని అభిమానులు ముద్దుగా పిలుకునే రాహుల్.. ఇటీవల ఓ స్పోర్ట్స్ వెబ్‌సైట్ ఇంటర్వ్యూ ఇచ్చాడు. ఈ సందర్భంగా పలు ఆసక్తికర ప్రశ్నలకు ద్రావిడ్ బదులిచ్చాడు.

‘నేను కలిసి ఆడిన అత్యుత్తమ ఆటగాడు సచిన్ టెండుల్కర్. క్వాలిటీ పరంగా, క్లాస్ పరంగా అతడు తిరుగులేని ఆటగాడు’ అని మాస్టర్ బ్లాస్టర్‌పై ద్రావిడ్ ప్రశంసలు కురిపించాడు.

మీరు ఎదుర్కొన్న ఫన్నీ స్లెడ్జింగ్ ఏది అనే ప్రశ్నకు బదులిస్తూ.. కోల్‌కతాలో చారిత్రక ఇన్నింగ్స్ సమయంలో ఆసీస్ ఆటగాళ్లు చేసిన స్లెడ్జింగ్ అని రాహుల్ తెలిపాడు. సాధారణంగా మూడో స్థానంలో బ్యాటింగ్‌కు వచ్చే నేను.. కోల్‌కతా టెస్టు మూడో ఇన్నింగ్స్‌లో ఆరోస్థానంలో క్రీజ్‌లోకి వచ్చాను. దీంతో సిరీస్ ముగిసే సమయానికి 12వ ఆటగాడివి అవుతావంటూ ఆసీస్ ఆటగాళ్లు స్లెడ్జింగ్ చేశారని రాహుల్ తెలిపాడు. ఆ టెస్టులో లక్ష్మణ్‌తో కలిసి అద్భుత ఇన్నింగ్స్ ఆడిన ద్రావిడ్ భారత్‌ను గెలిపించిన సంగతి తెలిసిందే.

తనపై తల్లిదండ్రుల ప్రభావం ఎక్కువని, వారే నాకు స్ఫూర్తి అని ద్రావిడ్ తెలిపాడు. చాక్లెట్లు తినడాన్ని అమితంగా ఇష్టపడతానని చెప్పిన వాల్.. వెంకటేశ్ ప్రసాద్‌కి శుభ్రత ఎక్కువని, రూంలో వస్తువులు చిందర వందరగా ఉన్నప్పుడు అతడి ముఖం చూస్తే వచ్చే ఆనందాన్ని వెలకట్టలేమని నవ్వుతూ చెప్పాడు.

నాకు మూఢ నమ్మకాలేవీ లేవు. బ్యాటింగ్‌కు దిగే ముందు ఎడమ మోకాలిపై కూర్చొని కుడి కాలుకి ప్యాడ్ కట్టుకోవడం అలవాటని ద్రావిడ్ చెప్పాడు. కెరీర్ ఆరంభంలో స్కోరు బోర్డు మీద తన పేరు ద్రావిడ్ అని ఉన్నప్పటికీ.. డేవిడ్ అని వార్తల్లో రాసేవారని రాహుల్ చెప్పుకొచ్చాడు.

ప్రస్తుత భారత బౌలర్లలో భువీ బౌలింగ్‌ను ఎదుర్కోవడం కష్టమని ద్రావిడ్ చెప్పాడు. కొత్త బంతిని భువనేశ్వర్ కుమార్ స్వింగ్ చేస్తుంటే.. ఆడటం ఛాలెంజ్ అని రాహుల్ అభిప్రాయపడ్డాడు.