రాహుల్ ద్రావిడ్‌ టీమ్ మేట్ సురేశ్ కుమార్ ఆత్మహత్య!

కేరళ మాజీ క్రికెటర్ ఎం సురేశ్ కుమార్ అలప్పుజలోని తన ఇంట్లో సీలింగ్‌కు ఉరేసుకొని ఆత్మహత్య చేసుకున్నారు. లెఫ్ట్ ఆర్మ్ స్పిన్నర్ అయిన సురేశ్ కుమార్ (47) అండర్-19 క్రికెట్లో రాహుల్ ద్రవిడ్‌తో కలిసి భారత్ తరఫున ఆడారు. బెడ్రూంలో సురేశ్ ఉరేసుకోగా.. శుక్రవారం సాయంత్రం 7 గంటల 10 నిమిషాల సమయంలో ఆయన భార్య, కుమారుడు ఈ విషయాన్ని గమనించారు.

దక్షిణ రైల్వేలో అధికారిగా పని చేస్తున్న సురేశ్.. కేరళ, రైల్వే జట్ల తరఫున క్రికెట్ ఆడారు. 1991 నుంచి 2005 మధ్య 72 ఫస్ట్ క్లాస్ మ్యాచ్‌లు ఆడిన సురేశ్.. 196 వికెట్లు పడగొట్టారు. 51 లిస్ట్-ఏ మ్యాచ్‌లు ఆడారు. బ్యాటింగ్ కూడా చేయగల సురేశ్.. ఫస్ట్ క్లాస్ క్రికెట్లో ఓ సెంచరీ కూడా చేశారు.

1994-95 రంజీ సీజన్లో తమిళనాడు లాంటి బలమైన జట్టుపై 12 వికెట్లు తీసిన సురేశ్ కుమార్.. కేరళ జట్టు తొలిసారి రంజీ ట్రోఫీ గెలవడంలో కీలక పాత్ర పోషించారు. హైదరాబాద్‌తో జరిగిన రంజీ మ్యాచ్‌లోనూ ఆయన 9 వికెట్లు తీశారు.

1992లో ద్రావిడ్ నాయకత్వంలోని భారత అండర్-19 జట్టులో సభ్యుడిగా ఉన్న సురేశ్.. న్యూజిలాండ్‌తో సిరీస్ ఆడారు. కేరళ నుంచి టీమిండియాకు ప్రాతినిధ్యం వహించిన తొలి క్రికెటర్‌గా సురేశ్ రికార్డ్ క్రియేట్ చేశారు. సురేశ్ బలవన్మరణం పట్ల అతడితో కలసి క్రికెట్ ఆడిన వారు తీవ్ర దిగ్భ్రాంతికి లోనయ్యారు.

1991-92 సీజన్లో న్యూజిలాండ్‌తో ద్రావిడ్ నాయకత్వంలోని భారత అండర్-19 జట్టు తలపడింది. ఓ మ్యాచ్‌లో భారత జట్టు 9 వికెట్లు కోల్పోగా.. పదో బ్యాట్స్‌మెన్‌గా ఉత్తర ప్రదేశ్ బౌలర్ క్రీజులోకి వచ్చాడు. అతడికి హిందీ మాత్రమే వచ్చు. మరో ఎండ్‌లో ఉన్న సురేశ్ కుమార్‌ మాళయాళం మాత్రమే మాట్లాడగలడు. దీంతో వారిద్దరూ ఎలా మాట్లాడుకుంటారో, ఎలా వ్యూహాలు రూపొందిస్తారోనని.. ద్రావిడ్ సహా డ్రెస్సింగ్ రూంలో ఉన్న వారంతా మదనపడ్డారట.

కానీ అందర్నీ ఆశ్చర్యపరుస్తూ.. వీరిద్దరూ కలిసి చివరి వికెట్‌కు 100 పరుగులు జోడించారు. ఈ ఇద్దరికీ ఒకరి భాష మరొకరికి తెలియకపోవచ్చు. కానీ వాళ్లిద్దరికీ క్రికెట్ భాషలో ప్రావీణ్యం ఉందని.. ఈ సంఘటనను గుర్తుకు తెచ్చుకుంటూ ద్రావిడ్ ఓ సందర్భంలో తెలిపారు.