రషీద్‌కి 30 ఏళ్ల అనుభవం వచ్చేసింది..!

అఫ్గానిస్థాన్‌ స్పిన్నర్ రషీద్ ఖాన్ వయసు 19ఏళ్లే కానీ.. అతనికి ఇప్పటికే 30 ఏళ్ల వ్యక్తికి ఉండే అనుభవం వచ్చేసిందని ఆ జట్టు కోచ్ ఫిల్ సిమన్స్ అభిప్రాయపడ్డాడు. ఇటీవల ముగిసిన ఐపీఎల్ 2018 సీజన్‌లో సన్‌రైజర్స్ హైదరాబాద్ తరఫున ఆడిన రషీద్ ఖాన్.. మొత్తం 17 మ్యాచ్‌లాడి 21 వికెట్లు పడగొట్టి అందర్నీ ఆశ్చర్యపరిచాడు. ముఖ్యంగా.. కోల్‌కతా నైట్‌రైడర్స్‌తో జరిగిన రెండో క్వాలిఫయర్ మ్యాచ్‌లో రషీద్ ఖాన్ బౌలింగ్‌, బ్యాటింగ్, ఫీల్డింగ్‌కి ప్రపంచ వ్యాప్తంగా మాజీ క్రికెటర్ల నుంచి ప్రశంసల జల్లు కురిసింది. అతని ఆటకి ఫిదా అయిన భారత క్రికెట్ అభిమానులు రషీద్‌కి భారత పౌరసత్వం ఇవ్వాలంటూ ట్విటర్‌లో ప్రభుత్వాన్ని కోరగా.. ఆ ట్వీట్స్‌కి కేంద్ర మంత్రి సుష్మా స్వరాజ్‌తో పాటు అఫ్గానిస్థాన్ అధ్యక్షుడు సైతం స్పందించారు.

బెంగళూరు వేదికగా జూన్ 14 నుంచి జరగనున్న ఏకైక టెస్టు మ్యాచ్‌లో భారత జట్టుతో అఫ్గానిస్థాన్ ఢీకొననున్న నేపథ్యంలో.. ఫిల్ సిమన్స్ మీడియాతో మాట్లాడాడు. ఇటీవల టెస్టు హోదా దక్కించుకున్న అఫ్గానిస్థాన్‌కి ఇదే తొలి టెస్టు మ్యాచ్. ‘రషీద్ ఖాన్ వయసు ఇప్పుడు 19 ఏళ్లే. కానీ.. అతను ఇప్పటికే 30 ఏళ్ల అనుభవం ఉన్న వ్యక్తిలా కనబడుతున్నాడు. జట్టు తన నుంచి ఏం ఆశిస్తుందో..? అతనికి బాగా తెలుసు. అతని సహచర స్పిన్నర్ ముజీబ్ వయసు 17 ఏళ్లే. అతను ఇంకా యువకుడు.. నేర్చుకోవాల్సి ఉంది. భారత్‌పై తొలి టెస్టులో వారిపై పెట్టుకున్న ఆశలకి వారు ఏ విధంగా న్యాయం చేస్తారో చూడాలి..!’ అని కోచ్ ఫిల్ సిమన్స్ వెల్లడించాడు.