చరిత్ర సృష్టించిన ఆప్ఘాన్ స్పిన్నర్ రషీద్

అప్ఘాన్ స్పిన్ సంచలనం రషీద్ ఖాన్ మరోసారి సంచలనం సృష్టించాడు. ఇటీవలే ఐసీసీ వన్డే బౌలర్ల జాబితాలో అగ్రస్థానంలో నిలిచిన రషీద్.. టీ20 బౌలర్ల జాబితాలోనూ నంబర్ 1 బౌలర్‌గా నిలిచాడు. షార్జా వేదిక జింబ్వాబేతో జరిగిన టీ20 సిరీస్‌లో సత్తా చాటిన ఈ ఆప్ఘాన్ స్పిన్నర్ 19 ఏళ్లకే అగ్రస్థానాన్ని సొంతం చేసుకున్నాడు. గత వారమే వన్డేల్లో నెంబర్ 1 బౌలర్‌గా నిలవడం ద్వారా ఈ ఘనత సాధించిన అతి పిన్నవయస్కుడిగా రషీద్ రికార్డ్ నెలకొల్పిన సంగతి తెలిసిందే.

రషీద్ 759 పాయింట్లతో అగ్రస్థానంలో నిలవగా.. కివీస్ బౌలర్ ఇష్ సోధి 700 పాయింట్లతో రెండో స్థానంలో నిలిచాడు. బ్యాటింగ్ విభాగం విషయానికి వస్తే.. కివీస్ హిట్టర్ కొలిన్ మున్రో అగ్రస్థానంలో ఉండగా.. ఆస్ట్రేలియా బ్యాట్స్‌మెన్ గ్లెన్ మ్యాక్స్‌వెల్ తర్వాతి స్థానంలో నిలిచాడు. వీరిద్దరి మధ్య పాయింట్ల వ్యతాస్యం కేవలం 2 పాయింట్లు మాత్రమే కావడం విశేషం.