బంగ్లాతో మ్యాచ్‌లో అశ్విన్ వరల్డ్ రికార్డ్

హైదరాబాద్ వేదికగా బంగ్లాదేశ్‌తో జరుగుతున్న ఏకైక టెస్టులో భారత ఆఫ్ స్పిన్నర్ రవిచంద్రన్ అశ్విన్ వరల్డ్ రికార్డు క్రియేట్ చేశాడు. అతి తక్కువ మ్యాచుల్లో 250 వికెట్లను తన ఖాతాలో వేసుకున్న బౌలర్‌గా అవతరించాడు. అశ్విన్ కేవలం 45 మ్యాచ్‌ల్లోనే ఈ ఫీట్ సాధించడం విశేషం. ఇప్పటి వరకూ ఈ రికార్డు ఆస్ట్రేలియా బౌలర్ డీకే లిల్లీ పేరిట ఉండేది. లిల్లీ 48 మ్యాచ్‌ల్లో 250 వికెట్లను తీశాడు. బంగ్లా కెప్టెన్ ముష్ఫికర్ రహీం వికెట్ తీయగానే అశ్విన్ లిల్లీ రికార్డును బ్రేక్ చేశాడు. ప్రస్తుత బౌలర్లలో దక్షిణాఫ్రికాకు చెందిన డేల్ స్టెయిన్ 49 టెస్టుల్లో 250 వికెట్లను తన ఖాతాలో వేసుకున్నాడు. తర్వాతి స్థానంలో సఫారీ జట్టుకే చెందిన అలెన్ డొనాల్డ్ (50 టెస్టులు) ఉన్నాడు. టెస్టుల్లో అత్యధిక వికెట్లు తీసిన బౌలర్‌గా కొనసాగుతున్న శ్రీలంక స్పిన్నర్ మురళీధరన్ ముత్తయ్య 51 మ్యాచ్‌ల్లో 250 వికెట్ల ఫీట్ సాధించాడు.

Test wicket no.250, @ashwinravi99 now the fastest to the landmark, gets it in 45 Tests #INDvBAN pic.twitter.com/H49xmZAl4s — BCCI (@BCCI) February 12, 2017 భారత్ తరఫున 45 మ్యాచ్‌ల్లో ఏ బౌలర్ కూడా కనీసం 200 వికెట్లు కూడా తీయలేకపోయారంటే వికెట్ల వేటలో అశ్విన్ జోరును అర్థం చేసుకోవచ్చు. గతంలో భజ్జీ 45 మ్యాచ్‌ల్లో 199 వికెట్లు తీయగలిగాడు. భారత్ తరఫున అతి వేగంగా 50 వికెట్లు, 100, 150, 200 వికెట్లు తీసిన రికార్డు కూడా రవిచంద్రన్ పేరిటే ఉంది.