300 వికెట్లు: అశ్విన్ కొత్త రికార్డు

కెరీర్ ఆరంభించిన అతి తక్కువ కాలంలో, అతి తక్కువ టెస్టుల్లో 300 వికెట్లు తీసిన అరుదైన ఘనతను సొంతం చేసుకున్నాడు టీమిండియా స్టార్ స్పిన్నర్ రవిచంద్రన్ అశ్విన్. నాగ్‌పూర్ టెస్టులో రెండో ఇన్నింగ్స్ లో శ్రీలంక ఆఖరి వికెట్ ను తీసి విజయపు లాంచనాన్ని పూర్తి చేసిన అశ్విన్ అదే వికెట్ తో కెరీర్‌లో మూడు వందల వికెట్లను తీసిన ఘనతను సొంతం చేసుకున్నాడు. తద్వారా టెస్టుల్లో అతి తక్కువ మ్యాచ్ లలో మూడు వందల వికెట్లను తీసిన రికార్డును సృష్టించాడు. తన 54వ టెస్టు మ్యాచ్ తో అశ్విన్ మూడు వందల వికెట్లను పూర్తి చేశాడు.

ఇంతకు ముందు ఈ రికార్డు ఆస్ట్రేలియన్ పేస్ దిగ్గజం డెనిస్ లిల్లీ పేరు మీద ఉండేది. ఆ స్పీడ్ స్టార్ తన 56వ మ్యాచ్ తో మూడువందల వికెట్లను పూర్తి చేసి.. రికార్డు స్థాపించాడు. ఇప్పుడు అశ్విన్ దాన్ని బ్రేక్ చేసి.. కొత్త రికార్డును స్థాపించాడు. శ్రీలంక బౌలర్ గమగేను బౌల్డ్ చేయడం ద్వారా అశ్విన్ మూడువందలో వికెట్ ను తీశాడు.

భారత్ తరఫున టెస్టుల్లో మూడు వందల వికెట్లు తీసిన అరుదైన బౌలర్లలో ఒకడిగా కూడా అశ్విన్ స్థానం సంపాదించాడు. ఇండియా తరఫు నుంచి ఇంతకు ముందు నలుగురు బౌలర్లు మాత్రమే టెస్టుల్లో మూడు వందలకు పైగా వికెట్లు తీశారు. కపిల్ దేవ్, అనిల్ కుంబ్లే, హర్భజన్ సింగ్, జహీర్ ఖాన్‌లు ఆ ఫీట్ ను సాధించారు. ఇప్పుడు ఐదో బౌలర్ గా అశ్విన్ ఆ జాబితాలో చేరాడు.