2019 వరల్డ్‌కప్ ఆడాలని ఉంది: అశ్విన్

ఇంగ్లాండ్ వేదికగా 2019లో జరగనున్న ప్రపంచప్‌లో తనకి ఆడాలని ఉందని భారత ఆఫ్‌ స్పిన్నర్ రవిచంద్రన్ అశ్విన్ వెల్లడించాడు. మణికట్టు స్పిన్నర్లు చాహల్, కుల్దీప్ యాదవ్‌లు భారత జట్టులో మెరుగ్గా రాణిస్తుండటంతో గత ఏడాదికాలంగా టీమిండియా వన్డే, టీ20 జట్టుకి దూరమైన అశ్విన్ కేవలం టెస్టులకే పరిమితమయ్యాడు. అయితే.. భారత సెలక్టర్లు పరిమిత ఓవర్ల క్రికెట్‌లో తనకి అవకాశమిస్తే సత్తా నిరూపించుకుంటానని ఈ 31 ఏళ్ల ఆఫ్ స్పిన్నర్ వెల్లడించాడు.

‘భారత జట్టులోకి ఎంపిక అనేది నా చేతుల్లో లేదు. టీమ్‌ మేనేజ్‌మెంట్, సెలక్టర్ల నిర్ణయంపై అది ఆధారపడి ఉంటుంది. అందుకే ఇప్పుడు నేను ఎంపిక గురించి ఆలోచించే కంటే.. ఆటని ఆస్వాదించడంపైనే ఎక్కువ దృష్టి పెడుతున్నా. కానీ.. భారత జెర్సీ ధరించి మళ్లీ ప్రపంచకప్‌లో ఆడాలని ఉంది. ఒకవేళ అవకాశం దొరికితే.. తప్పకుండా రెండు చేతులా వినియోగించుకుంటా’ అని అశ్విన్ వెల్లడించాడు. భారత్ తరఫున వన్డే‌ని చివరిసారిగా జూన్ 2017న వెస్టిండీస్‌పై అశ్విన్ ఆడాడు.