ఆస్ట్రేలియాతో సిరీస్‌కి అశ్విన్ దూరం..?

భారత్ వేదికగా ఆస్ట్రేలియాతో సెప్టెంబరు నుంచి జరగనున్న సుదీర్ఘ సిరీస్‌కి ఆఫ్ స్పిన్నర్ రవిచంద్రన్ అశ్విన్ దూరం కాబోతోన్నట్లు వార్తలు వస్తున్నాయి. విశ్రాంతి పేరుతో ఇప్పటికే శ్రీలంకతో వన్డే సిరీస్‌కి దూరమైన అశ్విన్.. ప్రస్తుతం ఇంగ్లాండ్‌లో కౌంటీ మ్యాచ్‌లు ఆడుతూ బిజీగా ఉన్నాడు. ఆస్ట్రేలియా జట్టు సెప్టెంబరు 17 నుంచి అక్టోబరు 13 వరకు భారత్‌తో ఐదు వన్డేలు, మూడు టీ20ల సిరీస్‌లో తలపడనుంది. ఆసీస్‌పై మంచి రికార్డు ఉన్న అశ్విన్ ఈ సిరీస్‌కి అందుబాటులో ఉండకపోతే.. అతని స్థానంలో చైనామన్ బౌలర్ కుల్దీప్ యాదవ్‌కి చోటు దక్కే అవకాశం ఉంది.

‘ఆస్ట్రేలియాతో సిరీస్‌ కోసం బీసీసీఐ నుంచి నాకు పిలుపు వస్తుందనే అనుకుంటున్నా. అయితే.. ప్రస్తుతం నేను కౌంటీల్లో ఆడుతున్న జట్టుకి పూర్తి స్థాయిలో అందుబాటులో ఉంటానని చెప్పాను. ఇప్పటికీ బీసీసీఐ నుంచి నాకు ఎలాంటి సమాచారం రాలేదు. ఒకవేళ శ్రీలంకతో సిరీస్ ముగిసిన తర్వాత నా ఎంపికపై చర్చిస్తారేమో చూడాలి. ఇంగ్లాండ్‌లో కౌంటీలు ఆడటం ప్రపంచకప్ 2019కి ఉపయోగపడుతుంది. ఆ టోర్నీ ఇక్కడే జరుగుతుంది కాబట్టి.. అప్పటికి పిచ్‌లపై పూర్తిస్థాయి అవగాహన వస్తుంది. కానీ.. తుది నిర్ణయం మాత్రం బీసీసీఐదే’ అని అశ్విన్ వివరించాడు.