ఆసీస్ క్రికెటర్ల బస్సుపై రాయితో దాడి

గువహటి: ఆసీస్ క్రికెటర్లు ప్రయాణిస్తున్న బస్సుపై గుర్తు తెలియని వ్యక్తులు మంగళవారం రాత్రి రాయితో దాడి చేశారు. రెండో టీ20 మ్యాచ్‌లో విజయం సాధించిన అనంతరం బరస్పరా స్టేడియం నుంచి హోటల్‌కు తిరిగి వెళ్తున్న సమయంలో ఈ ఘటన జరిగింది. క్రికెట్ బాల్ పరిమాణంలో ఉన్న రాయి బలంగా తగలడంతో బస్సు కుడి వైపు ఉన్న కిటికీ అద్దం పగిలిపోయింది. అదృష్టవశాత్తూ ఆ సీట్లో ఎవరూ కూర్చోకపోవడంతో.. ఆటగాళ్లకు ఎలాంటి గాయాలు కాలేదు.

ఈ ఘటనతో ఆసీస్ క్రికెటర్లు భయాందోళనకు గురయ్యారు. జట్టు సభ్యులు బస్సులో హోటల్‌కు వెళ్తున్నప్పుడు బస్సు కిటికీ అద్దంపై ఎవరో రాయి విసిరారు. ఈ ఘటన ఎంతో భయాన్ని కలిగించిందని ఆస్ట్రేలియా క్రికెటర్ ఆరోన్ ఫించ్ ట్వీట్ చేశాడు.

Pretty scary having a rock thrown through the team bus window on the way back to the hotel!! pic.twitter.com/LBBrksaDXI — Aaron Finch (@AaronFinch5) October 10, 2017
ఆసీస్ క్రికెటర్లు ప్రయాణిస్తున్న బస్సుపై దాడి జరగడం గత ఐదువారాల్లో ఇది రెండోసారి. గత నెల ఆరంభంలో చిట్టగాంగ్‌లో ఆస్ట్రేలియా క్రికెటర్లు ప్రయాణిస్తున్న బస్సుపై బంగ్లాదేశ్ అభిమానులు రాళ్లతో దాడి చేశారు.