సిక్సర్లతో వరల్డ్ రికార్డ్ బ్రేక్ చేసిన రోహిత్ శర్మ

భారత స్టార్ బ్యాట్స్‌మెన్ రోహిత్ శర్మ సిక్సర్లతో సరికొత్త రికార్డు నెలకొల్పాడు. ఆసీస్‌తో జరిగిన తొలి టీ20లో ఒక సిక్స్, ఒక ఫోర్ బాది 11 పరుగులకే అవుటైన రోహిత్ ప్రపంచ రికార్డు క్రియేట్ చేశాడు. రాంచీ టీ20లో బాదిన సిక్సర్‌తో ఈ ఏడాది అంతర్జాతీయ క్రికెట్లో 30 సిక్సర్లను తన ఖాతాలో వేసుకున్నాడు. వరుసగా ఐదేళ్లపాటు అంతర్జాతీయ క్రికెట్లో 30 లేదా అంత కంటే ఎక్కువ సిక్సర్లు కొట్టిన తొలి ఆటగాడిగా రోహిత్ శర్మ రికార్డు నెలకొల్పాడు.

పరిమిత ఓవర్ల క్రికెట్లో ఓపెనర్ అవతారం ఎత్తిన నాటి నుంచి రోహిత్ తన బ్యాటింగ్ పవరేంటో చూపిస్తున్నాడు. రెగ్యులర్‌గా సిక్సర్లు బాదుతూ.. ప్రత్యర్థి బౌలర్లపై ఒత్తిడి పెంచుతున్నాడు. 2013లో 36 సిక్సర్లు బాదిన ఈ ముంబై ప్లేయర్.. మరుసటి ఏడాది గాయం కారణంగా కొద్ది కాలంపాటు క్రికెట్‌కు దూరమయ్యాడు. అయినప్పటికీ.. 30 సిక్సర్లను తన ఖాతాలో వేసుకున్నాడు.


ఇక 2015లో 38 సిక్సర్లు బాదిన రోహిత్.. గతేడాది ఏకంగా 46 బంతుల్ని బౌండరీ అవతలికి పంపించాడు. ఈ ఏడాది వన్డేల్లోనే 29 సిక్సర్లు కొట్టిన శర్మ.. రాంచీలో నైల్ బౌలింగ్‌లో సిక్సర్ బాదడం ద్వారా ప్రపంచ రికార్డు సాధించాడు. ఇప్పటి వరకూ బ్రెండన్ మెకల్లమ్, షేన్ వాట్సన్ మాత్రమే వరుసగా నాలుగేళ్లపాటు 30కిపైగా సిక్సర్లు బాదారు. మెకల్లమ్ ఈ ఫీట్‌ను రెండుసార్లు సాధించాడు. గేల్, ధోనీ, యువరాజ్‌లు వరుసగా మూడేళ్లపాటు 30కిపైగా సిక్సర్లు కొట్టారు.