రోహిత్ ఆట వీవీఎస్‌ని తలపిస్తోంది..!

భారత ఓపెనర్ రోహిత్ శర్మ బ్యాటింగ్ చేస్తుంటే అలానే చూడాలనిపిస్తుందని మైక్రోసాప్ట్ సీఈవో సత్యనాదెళ్ల వెల్లడించారు. తాజాగా ‘టైమ్స్ ఆఫ్ ఇండియా‌’‌కి ఇచ్చిన ఇంటర్వ్యూలో ఆయన మాట్లాడుతూ వన్డే, టీ20లతో పోలిస్తే సుదీర్ఘ ఫార్మాట్ టెస్టులంటేనే తనకిష్టమన్నారు. ప్రస్తుతం బిజీ షెడ్యూల్ కారణంగా క్రికెట్‌ని ఎక్కువగా చూడలేకపోతున్నాని.. ఆన్‌లైన్‌లో మాత్రం స్కోరు వివరాల్ని తెలుసుకుంటానని సత్య నాదెళ్ల వివరించారు.

‘రోహిత్ శర్మ బ్యాటింగ్‌ని నేను చాలా ఇష్టపడతాను. అతని కవర్ డ్రైవ్స్.. వీవీఎస్ లక్ష్మణ్‌ బ్యాటింగ్‌ని తలపిస్తాయి. ఇంకా రోహిత్ హిట్టింగ్ చేస్తుంటే చూడటం ఓ మధురానుభూతి. జట్టులో కెప్టెన్ విరాట్ కోహ్లి కూడా చాలా బాగా ఆడతాడు. బౌలర్లపరంగా ఆఫ్ స్పిన్నర్ రవిచంద్రన్ అశ్విన్ వైవిధ్యంగా బంతులు విసురుతుంటాడు. ఓవర్‌లోని ఆరు బంతుల్లోనూ వైవిధ్యం కనిపిస్తుంది. గతంలో ఆస్ట్రేలియన్లు ఆడినట్లు ప్రస్తుతం భారత్ జట్టు పూర్తి స్థాయిలో ఆధిపత్యం చెలాయిస్తూ ఆడుతోంది. బిజీ షెడ్యూల్ కారణంగా మ్యాచ్‌లను ఎక్కువగా చూడలేకపోతున్నాను. కానీ.. ఆన్‌లైన్‌లో స్కోరు వివరాలు తెలుసుకుంటూ ఉంటా’ అని సత్య నాదెళ్ల వివరించారు.