రోహిత్ శర్మకి ‘ఆరు నెలలు’ గడ్డుకాలం..?

ఐపీఎల్‌లో సారథిగా ముంబయి ఇండియన్స్‌ జట్టుని మూడోసారి విజేతగా నిలిపిన రోహిత్ శర్మ ఆరు నెలల పాటు గడ్డుకాలం ఎదుర్కొన్నాడట. గత ఏడాది నవంబరులో తొడ కండరాల గాయంతో భారత్ జట్టుకి దూరమైన రోహిత్ శర్మ.. అనంతరం లండన్‌లో సర్జరీ చేయించుకుని క్రికెట్‌కి దూరమ్యాడు. ఈ ఏడాది ఐపీఎల్‌కి ముందు కొన్ని దేశవాళీ మ్యాచ్‌లు ఆడినా.. ఫిటెనెస్ నిరూపించుకోలేకపోయాడు. దీంతో అతను ఐపీఎల్‌కి కూడా దూరమవుతాడనే వార్తలు వచ్చాయి. కానీ.. ఏప్రిల్ 5న ఐపీఎల్ ప్రారంభం నాటికి పూర్తిగా ఫిటెనెస్ సాధించిన రోహిత్.. ఏకంగా జట్టును విజేతగా నిలిపాడు. తాజాగా ఐపీఎల్-2017 ట్రోఫీతో రోహిత్, తను ఉన్న ఫొటోను సోషల్ మీడియా ద్వారా అభిమానులతో పంచుకున్న అతని భార్య రితిక గత ఈ ముంబయి ఇండియన్స్ కెప్టెన్‌పై పొగడ్తల వర్షం కురిపించింది.

‘రోహిత్ నీకు చాలా గుండె నిబ్బరం ఉందని నాకు తెలుసు. ముంబయి జట్టుకి కెప్టెన్‌గా నువ్వు టైటిల్ గెలిచావని మాత్రమే అందరికీ తెలుసు. కానీ.. గత ఆరు నెలలుగా మళ్లీ మైదానంలోకి వచ్చేందుకు నువ్వు ఎంత కష్టపడ్డావో నాకు మాత్రమే తెలుసు. నీ జీవితంలో ఆ కొన్ని నెలలు గడ్డుకాలమే అని చెప్పాలేమో. ఏది ఏమైనా మళ్లీ నువ్వు సాధించావు. నాకు చాలా గర్వంగా ఉంది. మీ జట్టు కష్టపడి మళ్లీ ఐపీఎల్ టైటిల్‌ని వెనక్కి తెచ్చింది’ అని రితిక ప్రశంసించింది. జూన్ 1 నుంచి ఇంగ్లాండ్‌లో జరగనున్న ఛాంపియన్స్ ట్రోఫీ కోసం ఎంపిక చేసిన భారత్ జట్టులో రోహిత్ స్థానం సంపాదించిన విషయం తెలిసిందే.