తొలి టీ20లో అగర్ హ్యాట్రిక్.. సఫారీలు చిత్తు

ఆస్ట్రేలియాతో జరిగిన తొలి టీ20లో సొంతగడ్డపై దక్షిణాఫ్రికాకి ఘోర పరాభవం ఎదురైంది. జొహనెస్‌బర్గ్ వేదికగా జరిగిన ఈ మ్యాచ్‌లో టాస్ ఓడి తొలుత బ్యాటింగ్ చేసిన ఆస్ట్రేలియా 6 వికెట్ల నష్టానికి 196 పరుగులు చేసింది. కానీ.. ఛేదనలో తడబడిన దక్షిణాఫ్రికా అనూహ్యరీతిలో 14.3 ఓవర్లలోనే 89 పరుగులకి ఆలౌటైంది. దీంతో.. 107 పరుగుల తేడాతో గెలుపొందిన ఆస్ట్రేలియా.. మూడు టీ20ల సిరీస్‌లో 1-0తో ఆధిక్యంలో నిలిచింది.

2018లో బాల్ టాంపరింగ్ కారణంగా నిషేధానికి గురైన స్టీవ్‌స్మిత్, డేవిడ్ వార్నర్ మళ్లీ ఈ సిరీస్‌తో ఆ గడ్డపై అడుగుపెట్టారు. కానీ.. ఆరంభంలోనే వార్నర్ (4) వికెట్ చేజార్చుకోగా.. స్టీవ్‌స్మిత్ (45: 32 బంతుల్లో 5x4, 1x6) మాత్రం ఫర్వాలేదనిపించాడు. అతనితో పాటు కెప్టెన్ అరోన్ ఫించ్ (42: 27 బంతుల్లో 6x4, 1x6), అలెక్స్ క్యారీ (27: 22 బంతుల్లో 3x4, 1x6), అస్గన్ అగర్ (20 నాటౌట్: 9 బంతుల్లో 2x4, 1x6) కీలక ఇన్నింగ్స్ ఆడారు. దీంతో.. ఆస్ట్రేలియా 196 పరుగుల మెరుగైన స్కోరు చేయగలిగింది.

లక్ష్యఛేదనలో దక్షిణాఫ్రికా ఏ దశలోనూ గెలుపు దిశగా సాగలేదు. సూపర్ ఫామ్‌లో ఉన్న కెప్టెన్ డికాక్ (2) తొలి ఓవర్‌లోనే క్లీన్‌బౌల్డవగా.. ఇటీవల కెప్టెన్సీని వదులుకున్న డుప్లెసిస్ (24: 22 బంతుల్లో 3x4) మాత్రం కాసేపు క్రీజులో నిలిచి టాప్ స్కోరర్‌గా నిలిచాడు. కానీ.. ఇన్నింగ్స్ 8వ ఓవర్ వేసిన స్పిన్నర్ అగర్ వరుస బంతుల్లో డుప్లెసిస్, ఆండిలే (0), డేల్ స్టెయిన్ (0) రూపంలో హ్యాట్రిక్ వికెట్లు నమోదు చేశాడు. ఇక దుస్సేన్ (6), స్మట్స్ (7), డేవిడ్ మిల్లర్ (2) కూడా సింగిల్ డిజిట్‌కే ఔటైపోవడంతో సఫారీల ఓటమి ఖాయమైంది. ఆఖర్లో కగిసో రబాడ (22: 19 బంతుల్లో 1x4, 2x6) కాస్త బ్యాట్ ఝళిపించి అభిమానుల్ని అలరించాడు. ఇక రెండో టీ20 ఆదివారం జరగనుంది.