సచిన్ జెర్సీ.. బీసీసీఐ కీలక నిర్ణయం

క్రికెట్ దేవుడు సచిన్ టెండుల్కర్ ధరించిన పదో నంబర్ జెర్సీ కూడా అనధికారింగా రిటైర్ కానుంది. వన్డేల్లో సచిన్ ధరించిన ఆ జెర్సీతో మరే ఆటగాడు బరిలో దిగొద్దని బీసీసీఐ నిర్ణయించింది. 24 ఏళ్లపాటు క్రికెట్ ఆడిన టెండుల్కర్ 2013 నవంబర్లో ఆటకు వీడ్కోలు పలికాడు. 2012 మార్చిలో పాకిస్థాన్‌సై చివరి వన్డే ఆడిన మాస్టర్ పదో నంబర్ జెర్సీతోనే ఆ మ్యాచ్‌లో బరిలో దిగాడు. అప్పటి నుంచి దాదాపు ఐదేళ్లపాటు ఆ జెర్సీని ఎవరూ ఉపయోగించ లేదు.

కానీ శ్రీలంకతో వన్డే సిరీస్‌తో అంతర్జాతీయ క్రికెట్లోకి అరంగేట్రం చేసిన ముంబై పేసర్ శార్దుల్ థాకూర్ గత ఆగష్టులో పదో నంబర్ జెర్సీని ధరించాడు. దీంతో క్రికెట్ అభిమానులు శార్దుల్‌పై మండిపడ్డారు. న్యూమరాలజీ ప్రకారం నాకు పదో నంబర్ కలిసి వస్తుంది, నేను ఆ జెర్సీ వేసుకుంటానని మొదట్లో చెప్పిన శార్దుల్ తర్వాత వెనక్కి తగ్గాడు.

అనవసర వివాదాలు ఎందుకని భావించిన బీసీసీఐ పదో నంబర్ జెర్సీకి అనధికారికంగా రిటైర్మెంట్ ప్రకటించింది. అంతర్జాతీయ మ్యాచ్‌ల్లో భారత్ తరఫున ఇక మీదట ఎవరూ ఆ జెర్సీ ధరించరు. కానీ ఇండియా-ఏ జట్టు తరఫున, లిస్ట్-ఏ మ్యాచ్‌ల్లో మాత్రం పదో నంబర్ జెర్సీతో బరిలో దిగొచ్చు. 2013లో సచిన్ అన్ని ఫార్మాట్ల నుంచి వైదొలిగిన తర్వాత ముంబై ఇండియన్స్ జట్టు కూడా పదో నంబర్ జెర్సీకి రిటైర్మెంట్ ప్రకటించింది.