సచిన్ నీరసించి ఔటయ్యాడట..!

క్రికెట్ ఆడుతున్న తొలినాళ్లలో భారత క్రికెట్ దిగ్గజం సచిన్ తెందుల్కర్ భోజనం గురించే పట్టించుకునేవాడు కాదట. ఆకలి వేసినప్పుడు.. అక్కడ ఏది అందుబాటులో ఉంటే దాన్ని తినేసి మళ్లీ ఆటలో మునిగిపోయేవాడినని తెందుల్కర్ వెల్లడించాడు. పౌష్టికాహారం గురించి శ్రద్ధ వహించకపోవడంతో ఒకసారి నీరసంతో ఏకంగా మ్యాచ్‌నే వదులుకోవాల్సి వచ్చిందని సచిన్ గుర్తు చేసుకున్నాడు. దీంతో అప్పటి నుంచి డైట్ విషయంలో జాగ్రత్తలు తీసుకున్నానని మాస్టర్ బ్లాస్టర్ వివరించాడు.

‘క్రికెట్ నేర్చుకుంటున్న దశలో.. పౌష్టికాహారం గురించి నాకు బొత్తిగా అవగాహన ఉండేది కాదు. దాని విలువను అప్పట్లో నేను గుర్తించలేకపోయాను. ఒక రోజు లంచ్ బ్రేక్ వరకు మ్యాచ్ ఆడుతుండగా.. నీరసం వచ్చి ఏకాగ్రత కోల్పోయి ఔటయ్యాను. దీంతో కెరీర్‌లో మరోసారి ఇలా జరగకూడదని నిర్ణయించుకుని అప్పటి నుంచి పౌష్టికాహారం దృష్టి పెట్టాను’ అని తెందుల్కర్ వివరించాడు. 24 ఏళ్ల క్రికెట్ కెరీర్‌లో అన్ని ఫార్మాట్లలో కలిపి సచిన్ తెందుల్కర్ 100 శతకాలు బాదిన విషయం తెలిసిందే.