పోలీసులకి సచిన్ రూ. 15 లక్షల సాయం..!

భారత క్రికెట్ దిగ్గజం, ఎంపీ సచిన్ తెందుల్కర్ మహారాష్ట్రలోని ఓ పోలీస్ ట్రైనింగ్ సెంటర్‌కి ఆర్థిక సాయం చేశాడు. సంగ్లీ జిల్లాలోని ఈ ట్రైనింగ్ సెంటర్‌లో నీరు లేకపోవడంతో శిక్షణలో ఉన్న పోలీసులు తీవ్రంగా ఇబ్బందులు పడుతున్నట్లు తెలుసుకున్న సచిన్.. తన ఎంపీ నిధుల నుంచి రూ. 15 లక్షలను ‘వాటర్ సప్లై ప్రాజెక్ట్’ కోసం కేటాయించారు. ఈ విషయాన్ని పోలీస్ ట్రైనింగ్ సెంటర్ అధికారి సంజయ్ బుధవారం వెల్లడించారు.

‘ఈ వాటర్ సప్లై ప్రాజెక్ట్‌ కోసం నిధులు అందజేయాలని చాలా మంది సెలబ్రిటీలకి మేము లేఖ రాశాం. కానీ.. ఎవరి నుంచి సానుకూలంగా స్పందన రాలేదు. అయితే.. సచిన్ తెందుల్కర్ మా సమస్య విని వెంటనే రూ.15లక్షలను ఎంపీ నిధుల నుంచి కేటాయించారు. మా పోలీస్ ట్రైనింగ్ సెంటర్ ఎప్పటికీ తెందుల్కర్‌కు రుణపడి ఉంటుంది’ అని సంజయ్ ఆనందం వ్యక్తం చేశారు. ఈ ఏడాదిలోనే ముంబయి రోడ్లపై వర్షంలో కూడా విధులు నిర్వహిస్తున్న ట్రాఫిక్ పోలీసులను సచిన్ తెందుల్కర్ ప్రత్యేకంగా అభినందించిన విషయం తెలిసిందే.