కేరళ సీఎం మద్దతు కోరిన సచిన్

త్వరలో ప్రారంభంకానున్న ఇండియన్ సూపర్ లీగ్ (ఐఎస్‌ఎల్)‌ సీజన్‌కి మద్దతు ఇవ్వాల్సిందిగా కేరళ రాష్ట్ర ప్రభుత్వాన్ని భారత క్రికెట్ దిగ్గజం సచిన్ తెందుల్కర్ కోరాడు. ఈ మేరకు కేరళ ముఖ్యమంత్రి విజయన్‌ని గురువారం కేరళ బ్లాస్టర్స్ ఫ్రాంఛైజీ సహ యజమాని హోదాలో సచిన్ కలిశాడు. కొత్త సీజన్‌ ఈ నెల 17 నుంచి ప్రారంభంకానుండగా.. తొలి మ్యాచ్‌ కేరళలోనే జరగనుంది. ఈ నేపథ్యంలోనే ముఖ్యమంత్రిని సచిన్ కలిసినట్లు తెలుస్తోంది.

‘కొచీ వేదికగా తొలి మ్యాచ్‌తో ఐఎస్‌ఎల్ కొత్త సీజన్ ఆరంభంకానుంది. ఈ మ్యాచ్‌కి రావాల్సిందిగా సీఎం‌ని ఆహ్వానించేందుకు ఇక్కడికి వచ్చాం’ అని ముఖ్యమంత్రితో సమావేశం ముగిసిన తర్వాత మీడియాతో సచిన్ వెల్లడించాడు. సచిన్‌తో పాటు అతని సతీమణి అంజలి, కేరళ బ్లాస్టర్స్ సహ యజమానులు ఉన్నారు. గత సీజన్లతో పోలిస్తే.. ఈ సారి రెండు జట్లు అదనంగా టోర్నీలోకి రానున్నాయి. సుమారు నాలుగు నెలల పాటు సుదీర్ఘంగా మ్యాచ్‌లు జరిగేలా షెడ్యూల్ రూపొందించారు.