సింగర్ అవతారమెత్తిన సచిన్!

ఇన్నాళ్లు బ్యాటుకు పనిచెప్పిన మాస్టర్ బ్లాస్టర్ సచిన్ టెండూల్కర్ ఇప్పుడు గాత్రానికి కూడా పనిచెప్పాడు. కళ్లు చెదితే షాట్లతో యావత్తు క్రికెట్ ప్రంపచాన్ని తనవైపు తిప్పుకున్న లిటిల్ మాస్టర్ ఇప్పుడు తన స్వరంతో కట్టిపడేస్తున్నాడు. సచిన్ తాజాగా ‘100ఎంబీ’ పేరుతో తన డిజిటల్ యాప్‌ను విడుదల చేసిన సంగతి తెలిసిందే. ఆ యాప్ కోసం రూపొందించిన పాటను ప్రముఖ గాయకుడు సోనూ నిగమ్‌తో కలసి సచిన్ ఆలపించడం విశేషం. ‘క్రికెట్ వాలి బీట్’ అంటూ సాగే ఈ పాట ఇప్పుడు అందరి దృష్టిని ఆకర్షించింది. ఆదివారం రాత్రి జరిగిన టీవీ రియాలిటీ షో ‘ఇండియన్ ఐడల్ 9’ ఫైనల్‌లో సోనూ నిగమ్‌తో కలసి సచిన్ ఈ పాటను విడుదల చేశాడు.

సచిన్‌తో కలసి పాట పాడటం కొత్త అనుభూతినిచ్చిందన్న సోనూ నిగమ్.. లిటిల్ మాస్టర్‌ను పొగడ్తలతో ముంచెత్తాడు. సచిన్‌లో ఇంత గొప్ప సింగర్ ఉన్నాడనే విషయం ఇంతవకు తనకు తెలియదన్నాడు. ‘సచిన్ కొత్త ఇన్నింగ్స్‌లో నేను భాగం కావడం నాకెంతో గర్వకారణం. ఆయన నాతో కలసి క్రికెట్ వాలి బీట్ అనే పాటను పాడారు. ఆయన పాడే విధానం చూసి నేను ఆశ్చర్యపోయా. ఆయన చాలా మంచి సింగర్. పాటలో మేమెలాంటి పిచ్ కరెక్టర్‌ను వాడలేదు. మా ఇద్దరి గొంతులు అంత బాగా కలిసిపోయాయి’ అని సోనూ అన్నాడు.

కాగా, ‘జెట్ సింతసిస్’ అనే సంస్థ సచిన్ ‘100ఎంబీ’ యాప్‌ను రూపొందించింది. ఈ యాప్‌ కోసం షమీర్ టాండన్ పాటను స్వరపరిచారు. ఈ పాటను సోనూ నిగమ్‌తో కలసి సచిన్ ఆలపించాడు. ఈ యాప్ ద్వారా సచిన్‌కు సంబంధించిన విషయాలు, క్రికెట్ స్కోర్లు, క్రికెట్ స్టోరీస్‌తో పలు విషయాలను ప్రేక్షకులకు అందజేస్తారు.