1983 World Cup‌కి 39 ఏళ్లు.. సచిన్ టెండూల్కర్ ఎమోషనల్

భారత్ జట్టు ఫస్ట్ టైమ్ ప్రపంచకప్ గెలిచి నేటికి సరిగ్గా 39 ఏళ్లు అవుతోంది. 1983 ప్రపంచకప్ ఫైనల్లో కపిల్‌దేవ్ కెప్టెన్సీలోని భారత్ జట్టు.. భీకరమైన వెస్టిండీస్ జట్టుపై 43 పరుగుల తేడాతో గెలిచి తొలిసారి కప్‌ని ముద్దాడింది. ఎలాంటి అంచనాలు లేకుండా టోర్నీలో బరిలోకి దిగిన భారత్ జట్టు ఎవరూ ఊహించనిరీతిలో ఫైనల్‌కి చేరింది. కానీ.. ఫైనల్లో వెస్టిండీస్ బౌలర్ల దెబ్బకి 183 పరుగులకే ఆలౌటవడంతో భీకరమైన బ్యాటింగ్ లైనప్‌ ఉన్న విండీస్ టీమ్ అలవోకగా లక్ష్యాన్ని ఛేదించేస్తుందని అంతా ఊహించారు. వెస్టిండీస్ జట్టు అప్పటికే 1975, 1979 ప్రపంచకప్‌లో విజేతగా నిలిచి ఉండటంతో.. 1983లోనూ ఆ జట్టే విజేత అని జోస్యాలు మొదలైపోయాయి. కానీ.. భారత బౌలర్లు అద్భుతం చేశారు. వెస్టిండీస్ బ్యాటర్లని ముప్పుతిప్పలు పెట్టి కేవలం 140 పరుగులకే కుప్పకూల్చేశారు. టోర్నీలో కెప్టెన్ కపిల్‌దేవ్ బ్యాటింగ్‌లోనే కాదు.. బౌలింగ్, ఫీల్డింగ్‌లోనూ జట్టుని ముందుండి నడిపించాడు. ఆ తర్వాత 28 ఏళ్లకి 2011లో వన్డే ప్రపంచకప్‌ని మహేంద్రసింగ్ ధోనీ కెప్టెన్సీలో భారత్ జట్టు గెలిచిన విషయం తెలిసిందే. ఈ జట్టులో సభ్యుడిగా ఉన్న దిగ్గజ క్రికెటర్ సచిన్ టెండూల్కర్.. తనలో 1983 ప్రపంచకప్ స్ఫూర్తి నింపిందని మరోసారి గుర్తు చేసుకున్నాడు.

‘‘కొన్ని క్షణాలు మన జీవితంలో స్ఫూర్తి నింపుతాయి. అలానే కలలు కనేలా చేస్తాయి. 1983లో ఇదే రోజున మనం తొలిసారి ప్రపంచకప్ గెలిచాం. నేను చేయాలనుకున్నది ఇదేనని నాకు అప్పుడే తెలుసు’’ అని సచిన్ చెప్పుకొచ్చాడు.