సచిన్ అక్కడ ఫెయిల్ అయ్యాడట..!

క్రికెట్ చరిత్రలో ఎవరికీ సాధ్యంకాని విధంగా వంద శతకాలు బాదిన భారత క్రికెట్ దిగ్గజం సచిన్ తెందుల్కర్.. చదువులో మాత్రం ఆశించిన స్థాయిలో రాణించలేకపోయాడట. ఈ విషయాన్ని సచినే స్వయంగా అభిమానులతో సోషల్ మీడియా ద్వారా పంచుకున్నాడు. పాఠశాల స్థాయిలోనే బ్యాట్‌తో రికార్డుల బూజు దులిపి.. సంచలన ఇన్నింగ్స్‌‌లకి మారుపేరుగా నిలిచిన తెందుల్కర్‌కి 16 ఏళ్ల వయసులోనే టీమిండియా నుంచి పిలుపొచ్చిన విషయం తెలిసిందే.

తాజాగా సచిన్ తెందుల్కర్ తన చిన్నతనంలో చదువుకుంటున్నప్పుడు దిగిన ఫొటోని అభిమానులతో పంచుకుంటూ ‘ఈ ఫీల్డ్‌లో నేను ఎప్పుడూ మంచి స్కోరు చేయలేదు’ అని రాసుకొచ్చాడు. 1973లో జన్మించిన సచిన్ నవంబరు 15, 1989లో భారత్ జట్టులోకి అరంగేట్రం చేశాడు. అనతికాలంలో మైదానంలో శతకాల మోత మోగించి మాస్టర్ బ్లాస్టర్‌గా అభిమానులతో ముద్దుగా పిలిపించుకుంటూ.. క్రికెట్ దేవుడిగా ప్రశంసలు అందుకున్నాడు. 2013‌లో రిటైర్మెంట్ ప్రకటించిన సచిన్ 24 ఏళ్ల సుదీర్ఘ కెరీర్‌లో 200 టెస్టులాడి.. 51 శతకాలు, 463 వన్డేలాడి 49 సెంచరీలు నమోదు చేశాడు.