శ్రీనికి మరోసారి షాకిచ్చిన సుప్రీం కోర్టు!

భారత క్రికెట్ నియంత్రణ మండలి (బీసీసీఐ) మాజీ అధ్యక్షుడు ఎన్. శ్రీనివాసన్‌కు సుప్రీం కోర్టు మరోసారి షాకిచ్చింది. ఏప్రిల్ 24న జరగనున్న అంతర్జాతీయ క్రికెట్ సంఘం (ఐసీసీ) సమావేశానికి శ్రీనివాసన్ హాజరుకావడానికి వీళ్లేదని అత్యున్నత న్యాయస్థానం సోమవారం వెల్లడించింది. ప్రస్తుతం న్యాయపరమైన విచారణ ఎదుర్కొంటున్న శ్రీనివాసన్ ఐసీసీ సమావేశానికి వెల్లడానికి వీళ్లేదని తేల్చి చెప్పింది.

అయితే బీసీసీఐ సీఈవో రాహుల్ జోహ్రి, జాయింట్ సెక్రటరీ అమితాబ్ చౌదరి ఐసీసీ సమావేశానికి హాజరుకావచ్చని జస్టిస్ దీపక్ మిశ్రా నేతృత్వంలోని సుప్రీం కోర్టు వెల్లడించింది. లోధా కమిటీ సలహాలను అమలుచేయడంలో రాష్ట్ర క్రికెట్ సంఘాలకు, బీసీసీఐ కమిటీ ఆఫ్ అడ్మినిస్ట్రేటర్స్ (CoA) మధ్య సంబంధాల విషయమై బెంగాల్ క్రికెట్ అసోసియేషన్ (క్యాబ్) సుప్రీం కోర్టుకు వెళ్లింది. ఈ కేసు విచారణలో భాగంగా ఐసీసీ సమావేశంలో శ్రీనివాసన్ హాజరుకావడానికి వీళ్లేదని న్యాయస్థానం దిశానిర్దేశం చేసింది.

బీసీసీఐ, రాష్ట్ర క్రికెట్ సంఘాలతో ఎలాంటి సంబంధంలేని మీరు ఐసీసీ సమావేశంలో బీసీసీఐ తరఫున ఎలా పాల్గొంటారని ప్రశ్నించింది. కాగా, ఐపీఎల్ 2013 స్పాట్ ఫిక్సింగ్ తరవాత శ్రీనివాసన్‌ను బీసీసీఐ పూర్తిగా పక్కన పెట్టేసింది. ఐసీసీ చైర్మన్‌ పదవి నుంచి కూడా శ్రీనీని బీసీసీఐ తొలగించింది. ఈ ఏప్రిల్ 12న ఏర్పాటుచేసిన బీసీసీఐ సీఓఏ సమావేశానికి కూడా శ్రీనివాసన్ హాజరవడంతో అధికారులు దాన్ని వాయిదా వేశారు.