రెండో రోజూ అదే సీన్.. భారత్ 74/5

కో‌ల్‌కతా టెస్టును వరుణుడు వదలడం లేదు. వర్షం కారణంగా తొలి రోజు కేవలం 11.5 ఓవర్ల ఆట మాత్రమే సాధ్యం కాగా.. రెండో రోజు 21 ఓవర్లు మాత్రమే ఆట సాగింది. ఆట ఆరంభమైన సమయంలో వర్షం పడనప్పటికీ.. కాసేపటి తర్వాత వర్షం కురవడంతో ముందే లంచ్ విరామం ప్రకటించారు. ఆ తర్వాత కూడా ఆట సాగకపోవడంతో రెండో రోజు ఆట రద్దయినట్లు ప్రకటించారు.

తొలి రోజు లక్మల్ మూడు వికెట్లు తీసి భారత్‌ను ఇబ్బందుల్లోకి నెట్టగా.. రెండో రోజు షనక రెండు వికెట్లు తీసి టీమిండియాను మరింత దెబ్బ తీశాడు. మూడు వికెట్ల నష్టానికి 17 పరుగులతో రెండో రోజు ఆట ప్రారంభించిన భారత్‌‌ను పుజారా (102 బంతుల్లో 47 బ్యాటింగ్) ఆదుకునే ప్రయత్నం చేశాడు. మరో ఎండ్‌లో ఇబ్బంది పడుతూనే ఆడిన రహానే.. 4 పరుగుల వద్ద క్యాచ్ అవుట్‌గా వెనుదిరిగాడు. ఆ తర్వాత రవిచంద్రన్ అశ్విన్ (4)ను షనక పెవిలియన్ చేర్చాడు. దీంతో భారత్ 50 పరుగులకే ఐదు వికెట్లు కోల్పోయి కష్టాల్లో పడింది. ఆటకు వర్షం అంతరాయం కలిగించే సమయానికి పుజారా, సాహా (6) క్రీజులో ఉన్నారు. భారత్ 32.5 ఓవర్లలో 5 వికెట్ల నష్టానికి 74 పరుగులు చేసింది.