భారత క్రికెటర్ షమీ ఇంటిపై దాడి..!

టీమిండియా పేస్ బౌలర్ మహ్మద్ షమీ ఇంటిపై కొంతమంది యువకులు దాడికి పాల్పడ్డారు. కోల్‌కతాలోని కట్జూనగర్ లోని షమీ ఇంటి వద్ద వీరు గలాభా చేశారు. గత శనివారం ఈ సంఘటన చోటు చేసుకోగా.. తాజాగా పోలీసులు నిందితులను అదుపులోకి తీసుకున్నారు. జాదవ్ నగర్ పోలీసులు ఇచ్చిన సమాచారం ప్రకారం.. ఈ సంఘటన వివరాలు ఇలా ఉన్నాయి. శనివారం రోజున షమీ తన కారును ఒక అపార్ట్ మెంట్ ముందు నిలబెట్టుకుని ఉండగా, అక్కడ ముగ్గురు యువకులు షమీతో అనుచితంగా ప్రవర్తించారు. కారు రోడ్డుకు అడ్డంగా ఉందంటూ గొడవకు దిగారు.

డ్రైవర్ పై వారు దాడికి పాల్పడబోగా.. వారికి సర్ది చెప్పి అక్కడ నుంచి పంపించివేశాడు షమీ. ఆ తర్వాత షమీ తన డ్రైవర్ తో కలిసి తన ఇంటికి చేరుకోగా... సదరు యువకులు మళ్లీ షమీ ఇంటి వద్దకు వచ్చారు. అక్కడా గలాభా చేశారు. సెక్యూరిటీ సిబ్బందితో గొడవకు దిగారు. ఇంట్లోకి చొచ్చుకుపోయే ప్రయత్నం చేశారు. ఈ ఘటనపై షమీ పోలీసులకు ఫిర్యాదు చేసినట్టుగా తెలుస్తోంది.

యువకులు షమీ ఇంటిపై దాడి చేసిన వైనం అంతా సీసీ కెమెరాల్లో రికార్డు అయ్యింది. దాన్ని ఆధారంగా చేసుకుని విచారణ జరిపిన పోలీసులు దాడికి పాల్పడింది ఎవరో గుర్తించారు. వారిని అదుపులోకి తీసుకుని కేసులు నమోదు చేశారు. నిందితులపై ఐపీసీ సెక్షన్ 506, సెక్షన్ 341 కింద కేసులు నమోదు చేసినట్టుగా పోలీసులు తెలిపారు.