మొహాలి వన్డేలో ధావన్ దూకుడు..!

శ్రీలంకతో మొహాలి వేదికగా జరుగుతున్న రెండో వన్డేలో భారత్ ఓపెనర్ శిఖర్ ధావన్ దూకుడుగా ఆడుతున్నాడు. తొలి వన్డేలో డకౌటైన ఈ ఓపెనర్.. మ్యాచ్ ఆరంభం నుంచే లంక బౌలర్లపై ఎదురుదాడికి దిగాడు. ఇన్నింగ్స్ రెండో ఓవర్‌ వేసిన లక్మల్ బౌలింగ్‌లో తొలి బంతినే బౌండరీకి తరలించి తన ఉద్దేశం చాటిన ధావన్.. పదో ఓవర్‌ వేసిన తిసార పెరీరా బౌలింగ్‌లో వరుసగా రెండు ఫోర్లు, 14వ ఓవర్ వేసిన ప్రదీప్ బౌలింగ్‌లో మూడు ఫోర్లు బాదేశాడు.

రెండో ఓవర్ నుంచే గతి తప్పిన బంతుల్ని వరుసగా బౌండరీకి తరలిస్తూ వచ్చిన ధావన్ 47 బంతుల్లో 7x4 సాయంతో కెరీర్‌లో 23వ అర్ధ శతకాన్ని పూర్తి చేసుకున్నాడు. దీంతో టాస్ ఓడి తొలుత బ్యాటింగ్ చేస్తున్న భారత్ జట్టు 14.3 ఓవర్లు ముగిసే సమయానికి వికెట్ నష్టపోకుండా 74 పరుగులతో కొనసాగుతోంది. మరో ఎండ్‌లో కెప్టెన్ రోహిత్ శర్మ 23 పరుగులతో కొనసాగుతున్నాడు.