శిఖర్ ధావన్‌కి కెరీర్‌లో బెస్ట్ ర్యాంక్..!

అఫ్గానిస్థాన్‌తో గత వారం ముగిసిన ఏకైక టెస్టు మ్యాచ్‌లో శతకం బాదిన భారత ఓపెనర్ శిఖర్ ధావన్ కెరీర్‌లో బెస్ట్ ర్యాంక్‌ని అందుకున్నాడు. ఐసీసీ తాజాగా విడుదుల చేసిన టెస్టు ర్యాంకింగ్స్‌లో ధావన్ 10 స్థానాలు ఎగబాకి 24వ ర్యాంక్‌ని అందుకున్నాడు. అతనికి జోడీగా ఆ టెస్టులోనే సెంచరీ సాధించిన మురళీ విజయ్ కూడా ఆరు స్థానాల్ని మెరుగుపర్చుకుని 23వ స్థానంలో నిలిచాడు. ఈ ఓపెనింగ్ జోడి శతకాలకి తోడు బౌలర్లు కూడా సమష్టిగా రాణించడంతో రెండు రోజుల్లోనే ఆ టెస్టుని ముగించిన భారత జట్టు ఇన్నింగ్స్, 262 పరుగుల తేడాతో అలవోకగా గెలుపొందిన విషయం తెలిసిందే.

అఫ్గానిస్థాన్‌తో టెస్టులో ఆరు వికెట్లు పడగొట్టిన స్పిన్నర్ రవీంద్ర జడేజా బౌలర్ల జాబితాలో ఒక స్థానాన్ని మెరుగుపర్చుకుని మూడో స్థానంలో నిలవగా.. ఫాస్ట్ బౌలర్లు ఇషాంత్ శర్మ, ఉమేశ్ యాదవ్ రెండేసి స్థానాలు ఎగబాకి 25, 26వ స్థానాల్లో నిలిచారు. టీ20ల్లో అగ్రస్థానం, వన్డేల్లో రెండో స్థానంలో ఉన్న అఫ్గానిస్థాన్ స్పిన్ సంచలనం రషీద్ ఖాన్.. ఏకైక టెస్టులో ఘోరంగా విఫలమవడంతో.. అతను 119 స్థానంతో సరిపెట్టుకోవాల్సి వచ్చింది.