ఛాలెంజ్.. కోహ్లి 120 సెంచరీలు చేస్తాడు: అక్తర్

టీమిండియా కెప్టెన్ విరాట్ కోహ్లి అంతర్జాతీయ క్రికెట్లో 50 శతకాలు పూర్తి చేసుకుని మంచి ఊపు మీద ఉన్నాడు. కోల్‌కతా టెస్టులో సెంచరీ చేయడంతో అత్యంత వేగంగా ఈ ఫీట్ సాధించిన ఆటగాడిగా.. ఆమ్లాతో కలిసి అగ్రస్థానంలో నిలిచాడు. శతకాల అర్ధ శతకం పూర్తి చేసుకున్న కోహ్లిపై ప్రశంసల జల్లు కురుస్తోంది. పాకిస్థాన్ మాజీ ఫాస్ట్ బౌలర్ షోయబ్ అక్తర్ అయితే.. విరాట్‌ను ఆకాశానికి ఎత్తాడు.

‘విరాట్ కోహ్లి ఆధునిక క్రికెట్లో గొప్ప ఆటగాడు. ఛేజింగ్‌లో ఇన్నింగ్స్ నిర్మించడంలో అతడికి ఎవరూ సాటిలేరు. అతడిప్పటికే 50 సెంచరీలు సాధించాడు. సచిన్ రికార్డును బ్రేక్ చేసే ఏకైక ఆటగాడు కోహ్లి మాత్రమే. కానీ అతడిపై ఎలాంటి ఒత్తిడి లేదు. విరాట్ ఆటను ఆస్వాదిస్తున్నాడు.

మిస్బా ఉల్ హక్ 43 ఏళ్లు వచ్చే వరకూ ఆడితే.. విరాట్ 44 ఏళ్లు వచ్చే వరకూ కచ్చితంగా ఆడతాడు. విరాట్ సుదీర్ఘ కాలంపాటు క్రికెట్ ఆడగలడు. కోహ్లి 120 సెంచరీలు చేయగలడు’ అని షోయబ్ అక్తర్ చెప్పాడు.

నేను కోహ్లికి పోటీగా క్రికెట్ ఆడితే బాగుండేది. కానీ అతడు చాలా చిన్నవాడై పోయాడు. అతడు నా బంతిని ఒక్కసారే ఎదుర్కొన్నాడు. శ్రీలంకలో నేనే వేసిన ఒకే బంతిని మాత్రమే కోహ్లి ఆడాడు. అప్పుడు మోకాలి గాయంతో నేను బాధపడుతున్నా. చిన్నవాడైన కోహ్లి చేతుల నిండా టాటూలతో క్రీజులో నిలబడటం నాకు ఇప్పటికీ గుర్తే. అతడిలో మెరుపు ఉంది. పాకిస్థాన్ డ్రెస్సింగ్ రూంలో మేమంతా అతడి గురించి చర్చించుకున్నాం అని షోయబ్ అక్తర్ తెలిపాడు.